Italian Cup aṭangin Milan an tla

Serie A champion AC Milan chuan player 10-a khel Torino 1-0 in an ngam lo a, coach Stefano Pioli leh a naute hi mualpho takin Italian Cup last 16-ah an zinkawng a tawp.

Nilaini zan San Siro-a inkhelah Milan hi chak zawk tura rinkai pawh an ni a, an player ṭha tam zawk chu inkhel bul ṭantu zingah pawh an tel lo, hei vang hian goal khung an harsat, a tawpah an tuar zui.

Minute 69-naah Torino defender Koffi Djidji chu yellow card pahnihna hmuh vangin hnawhchhuah a ni a, hun tawp lam minute 20 chhung player tam zawk an nih bakah, bench aṭangin Theo Hernandez leh Oivier Giroud te lut tawh mah se goal an la khung thei chuang lo.

Extra time khelh a ni a, minute 114-naah mikhual Torino tan Michel Adopo chuan inkhela goal awmchhun a khung. Torino hian quarterfinal-ah chuan Sampdoria leh Fiorentina inkhela chak zawk an hmachhawn leh dawn a ni.

Stefano Pioli naute hian an league match hnuhnung berah AS Roma chu 2-2 in an inhnehtawk pui tawh a, hemi ṭum hian goal hnih an khung hmasak an hum thei lo, tun kar tawpa Lecce an hmachhawn hunah insiamṭhat ngei an tum tawh ang.