Zanin dar 6:00-ah Manchester Derby
Ni 105 liam ta khan Manchester City chuan Eithad Stadium-ah Manchester United an chaih phar a, Erling Haaland-a'n a duh hun hunah a pet goal emaw tih mai turin Norwegian striker hian Manchester Derby a khelh hmasak berah hattrick a siam.
Zanin dar 6:00 hian Man United-in an mual Old Trafford-ah Man City an mikhual dawn a, thla thum vel chhung lekin boruak a dang ta hle. Etihad Stadium-a bench-a ṭhu tluan Cristiano Ronaldo-a'n Old Trafford a chhuahsan tawh a, Portuguese forward awm loh hnuah Erik Ten Hag-a hote match riat an chak zawn.
Man United hian point 35 hmuin palinaah an awm a, Man City nen an inkarah point li chiah a awm. Dutch manager Ten Hag hnuaiah Man United-in beiseina thar an nei a, Pep Guardiola kaihhruai City hmachhawn pawh an châk zek zek tawh ang.
Haaland Vs Rashford
Manchester Derby hnuhnung ber an khelh ṭum kha chuan Haaland leh Marcus Rashford te hi khaikhin chi an ni lo a, an inthlau hle. Premier League bikah Haaland (21 goals) hian Rashford-a (7) goal khung let thum khung tawh mah se World Cup zawh hnuah striker pahnih khaikhin hi a rem lohna a awm ta lo.
World Cup khelh hunlaia hahdamna hun ṭha nei Haaland hian December thla khan match thum khelin goal li a khung a, kuminah erawh goal a la khung lo. Chutihrulain Haaland hi FA Cup-a City-in Chelsea 4-0 a an sawp ṭumin a inlan lo a, Southampton lakah minute 34 chauh a khelh bawk avangin derby hmachhawn turin a inpeih khawp ang.
Rashford hian World Cup-ah goal thum khungin inrintawkna a nei a, United tan match ruk khel leh tawhin goal sarih a khung bakah assist vawi hnih a nei. English striker hian a vanglai hun a hmang mek a, City tlarhnung tan ven tham a ni.
Pep vs Ten Hag
Chak turin player ṭha an pawimawh a, chutihrualin a pawimawh ber zawk chu player ṭha rem khawmtu manager-te an ni. Pep Guardiola-a'n league harsa bera ngaih Premier League a thunun thei a, a ṭhatzia pholang turin fiahna a paltlang tam tawk tawh. Erik Ten Hag erawhin Premier League-ah a season khatna a hmang ve mek.
Ten Hag hian result ṭha an neih theih nan khelmual pawnah inthununna khauh tak a kaltlangpui a, club legend Ronaldo pawh a duhsak bik lo. Hei chauh hi a ni lo, mut rei vanga team meeting nang hman lo Rashford pawh bench-ah a dah ngam.
Dutch manager Ten Hag hi Pep ang thoa possession football khel ṭhin a ni a, chutihrualin Spanish manager aṭang hian thil tam tak a zir ang. Pep leh Ten Hag hi Bayern Munich-ah an thawk ho tawh a, Spanish manager hian senior team enkawlin Dutch manager hian reserve team a enkawl thung.
An intawnna hnuhnung ber thlirkir chuan Ten Hag-a'n a naute tlarhnung aṭanga ball inpek kualtir a tum a, City-in pressure an pek ṭhat avangin United player-ten ball an inpe thei lo. City-in first half-ah 4-0 in an hma an hruai tawh a, inkhel tawpah erawh 6-3 a ni thung.
Second half-ah Ten Hag-a hote an insiamṭha a; goal chauh ni loin shot, possession leh pass-ah te an hmelma hi an thlau ta lo. Tunah erawh an inkhelh hmasak ṭum aiin tun hnaia an khelh dan en a fuh ta zawk.
Pep-a hote tun hnaiah an tlahniam a, kum hlui thlah zan khan Everton lakah point hnih an hloh. Match hnuhnung berah Southampton 2-0 in an hneh lo a, chutihrualin League Cup a nih avangin Pep-a'n player ṭha a hahdamtir tih hriat tel a ṭul.
Engtin zel?
United-in tun hnaia hma an sawn chhan hi player-te inlungrualna piah lamah player ṭha an kawl vang a ni a, World Cup-a United player ṭhahnem tak awm khan an squad chhahzia a lantir. Chung player zingah chuan Casemiro a tel a, Real Madrid midfield luahlumtu hian United-ah pawh a ṭhatzia a pholang ta.
Scott McTominay leh Fred te an thawkrim ṭhin a, Etihad Stadium-ah thawhrim ringawt a tawk lo tih a lang tawh. Casemiro erawhin a khingpuite ball inpe tur a chhut chah thiam bakah ball a pe chhuak thiam tel - United harsatna lian tak chinfelin a awm.
Chutihrualin City thluak bur Pep-a'n derby atan 'ngaihtuahna âtthlak' tak a neih thu a sawi a, a team rem dan tur leh khelhtir dan tur hriat a châkawm tawh hle. Spanish manager hi Champions League final-a defensive midfielder tel loa a naute khelhtirtu a ni a, a ngaihdan danglam tak hi hlawhtlinpui ṭhin mah se tihsual chang pawh a nei. Engpawh chu ni se, thluak hmang nasa manager pahnih inhmachhawn tur a nih miau avangin tun hnaia Manchester Derby hmuhnawm ber a ni phak ta lo a nih pawhin en châkawm ber zawng a ni chiang a ni.