Aizawl FC an vanduai Kolkata-ah point 2 an hloh

Aizawl FC-in chak tumin Kolkata-a Vivekananda Yuba Bharati Krirangan stadium an pan a, minute 90-ah 2-1 in hma an hruai a, hun pek belh minute 12-naah goal an chhuah a, 2-2 in an ṭin.

Nimin tlaia inkhel hmuhnawm takah hian Aizawl FC tan Henry Kisekka chuan ṭum hnih ngawt Mizoram team tana hmahruaina goal a khung a, nimahsela Marcus Joseph-a goal hnih hmangin mual neitu lamin an sût zo.

Aizawl FC hian Mizo player an ring ngam chho zel a, a tira bul ṭantu zingah foreigner pahnih striker Henry Kisekka leh Akiko Saito-te chiah hi Mizo ni lo an awm.

Mohammedan lamin foreigner man to rual pali an luh rualtir ṭhawt bakah Mizo tlangval Sairuatkima chu defender-ah an chhawr bawk.

Aizawl FC hian minute 32-naah goal an khung hmasa a, 'assist king' Tharpuia siamsak chu Henry-a'n khungin 1-0 a ni a, hei hi Mohammedan lamin first half tawp dawn injury time-ah Marcus hmangin an sût a, half time-ah 1-1 a ni.

Second half a ni a, Aizawl FC bawk an che leh a, R Lalthanmawia thawh rah sengin Henry bawkin Aizawl FC hmahruaina goal a khung.

An goal hi an hum ngei dawnin lang tawh mah se injury time-a minute 12-naah Mohammedan hian an sût a, minute 90+12-a Marcos-a goal thun avangin Aizawl FC-in point hnih hlu tak an hloh ta a ni.

Tute nge khel?

BVT tlangval Muansanga'n goal a veng a, defender-ah tawnhriat ngah rual Chhawnkima, Adinga leh Buanga bakah foreigner Akito-te an awm.

Midfied-ah Mizo tlangval pathum - Amawia, Ramsanga leh Chhantea an ding tlar a; a hmaah Henry bakah Champhai star Tharpuia leh Hnahthial tlangval Afela-te'n bul an ṭan.

Anni bakah hian a tira bench lama ṭhu Emmanuel Makinde, Joseph Vanlalhruaia, Matias Veron leh Jakob Vanlalhlimpuia-te an ranw tlan lut bawk.

Aizawl FC hian point 14 hmuin pasarihna an ni mek.