2022 FIFA Best Awards nominee-ah Messi a langsar

Football thuneitu sang ber FIFA chuan 2022 FIFA Best Awards dawng thei tur chu Ningani zan khan an puang. Best FIFA Men’s Player dawng thei tur player 14 zingah FIFA World Cup-a Argentina champion puitu captain Lionel Messi a langsar hle.

FIFA Best Awards-ah hian category hrang hrang a awm a, mipa leh hmeichhe tan best player, best coach leh best goalkeeper chawimawina a awm bakah goal mawi ber hnenah FIFA Puskás Award leh supporter ṭha ber hnenah Best FIFA Fan Award hlan ṭhin a ni bawk.

Category tina chawimawina dawng tur hi FIFA website kaltlangin February 3, Zirtawpni thleng a vote theih dawn. February thla hian chawimawina dawng thei tur hming pathum an chhawp chhuak leh ang.

Kumin FIFA Best Awards-ah hian nikum November-December thlaa neih zawh tak FIFA World Cup chhiar tel a ni a, football inelna sang hian chawimawina dawng turah pawh nghawng thui tak a nei ang.

Chawimawina dawng tura rinkai Messi chuan World Cup nomawi a chawi bakah Golden Ball a dawng a, Argentine player zinga World Cup history-a goal khung tam ber leh World Cup-a inlan tam ber record a siam thar bawk.

Messi elpui tur Kylian Mbappe chu World Cup final-ah a vanduai zawkah ṭang mah se hattrick a siam. French forward hi 2021-22 UEFA Champions League Team of the Season-ah a tel bawk. Player ṭha pahnih hi PSG tan an khel ve ve a, 2021-22 Ligue 1 leh Trophée des Champions-ah an champion a, Mbappe bik hi Ligue 1-a goal khung tam ber a nih bakah assist ngah ber a ni bawk.

Ballon d'Or dawngtu Karim Benzema erawh France squad aṭanga hliam vanga a inhnuhdawh avangin Best FIFA Men’s Player dawng turin a buk a rit ta lo. Chutihrualin Erling Haaland-a'n World Cup khel lo mah se a hming lam hmaih a thiang lo.

Norwegian striker Haaland hian Borussia Dortmund chu season hmasa khan league-ah pahnihna nihpuiin German Bundesliga Team of the Season-ah a tel a, Manchester City-ah insawnin Premier League-a vawi thum hattrick siam turin match riat chiah a mamawh.

Best coach nominee-ah World Cup-a Argentina champion puitu Lionel Scaloni buk a rit a, ani hian an ram team chu match 36 chhung hneh loh nei loin a kaltluanpui.

Scaloni elpui ber tura ngaih chu Carlo Ancelotti a ni a, Italian coach hian Real Madrid chu Champions League bakah La Liga leh Supercopa de España-ah nomawi a chawipui.

Coach nominee-ah hian France coach Didier Deschamps, World Cup-a Morocco semifinal hruai thlengtu Walid Regragui leh Man City manager Pep Guardiola te an tel bawk.