Arsenal tan fiahna tak tak hun a thleng!

Premier League hmahruaitu Arsenal chu champion turin an ṭha tawk em, tih fiah a ni dawn ta. Mikel Arteta naute hian Pathianni zan dar 10:00-ah an hmelma Tottenham Hotspur an lenchilh dawn - thlasik lai ni mah se North London Derby a lum leh khawp ang.

Gunners hian Spurs an hmachhawn hnua an tum leh tur chu Manchester United an ni dawn, heng inkhel hautak pahnih hi Arsenal an puitling tawk em, tih leh, league champion turin an ṭha tawk em, tih fiahna a ni dawn.

Nikum May thla khan Tottenham Hotspur Stadium-ah Arsenal hi 3-0 in an mualpho a, beisei taka an thlir Champions League an khel phal lo zui a, an elpui Spurs erawhin European football inelna sang hi an khelh phah thung.

Jesus tel lohna

Manchester City aṭanga an lakluh Gabriel Jesus-a'n Arsenal tan hmun pawimawh tak a chang a, league hmahruaitu an nih theih chhan pawh a ni. Mahse, World Cup a khelhnaah Jesus hi a inhliam a, a hmunruak luah tur an la lei lo.

Eddie Nketiah chu Jesus hmunruak luahtu a ni a, ani hian a hna a tlin viau. Arteta-a'n, "A ṭha tulh tulh," tiin Nketiah chungchang a sawi a, tun ṭumah pawh hian tlarhma laia rinrawl a ni ang, a tlan chak bakah a taimakna chu an chhawr ṭhin.

Arsenal tana chanchin lawmawm pakhat ch Emile Smith Rowe dam ta hi a ni ang. English forward hi FA Cup-ah a inlan thei tawh - Spurs lakah pawh mamawh chuan chhawr theih a ni dawn, tlarhma lai leh sirah a hman theih ang.

Smith Rowe chuan, "Nikuma thil thleng kha kan la hre reng, chuvangin thungrulh kan tum tur a ni ang. Inbuatsaihna kan neih ṭhat tawk a ngai a, he inkhel atan hian kan rilru leh taksa zawng zawng kan hman a ngai," a ti.

Kane awmna

Erling Haalend thawm a lian a, match tin deuhthawah goal a khung avangin a mak hran lo. Hetihlai hian Tottenham striker Harry Kane pawhin goal khung a chawlhsan bik lo, tun season league match 18 aṭangin goal 15 a khung - assist vawi khat a nei bawk.

England captain hian Spurs tan EPL goal 198 a khung tawh, mellung pawimawh bik phun turin hun ṭha a nei mek. Club tana goal khung hnem ber Jimmy Greaves tluk tur pawhin goal khat chauh a mamawh tawh, sulhnu ṭha bik chu a hnutchhiah ngei dawn.

Theih ni se Kane hian Arsenal laka goal khung chunga record siam a duh ang. A tan North London Derby hi goal khung harsatna a ni lo tih kan hriat a ngai, an hmelma club hi vawi 18 a hmachhawn tawhah goal 14 a khung - Pathianni zanah pawh Gabriel leh William Saliba te tan ven uluk a ngai hle ang.

Kane hian Premier League goal khung hnem ber Alan Shearer (260 goals) chu a la hlat deuh a, chutihrualin pahnihna Wayne Rooney (208) chu a hlat tawh lo. Manchester United striker hlui hi chu tun season chhungin a khum hman a rinawm.

A hmuhnawm lai tur

Odegaard vs Hojbjerg
Arsenal captain Martin Odegaard hi Premier League midfielder hmuhnawm bik zinga mi a ni mek a, a bik takin goal nawr kawngah a ṭangkai. Tun season-ah league goal sarih khungin a ṭhiante khung tur vawi nga a siamsak tawh bawk.

Odegaard hian hmathlir thui tak a nei ṭhin a, hei hi an chakna hnar a ni. Gunners captain hmathlir titawp thei tur chu Hojbjerg a ni thung. Denmark midfielder hian Odegaard ang lo takin tharum a ngah thung, defender-te tha tichaktu a nih ṭhin avangin a ṭangkai leh ang.

Perisic vs Saka
Ivan Perisic hi tlarhma lam sira khel ṭhin a ni a, mahse Antonio Conte-a'n wing back atan a hmang ṭhin. Croatian forward hian tawnhriat a nei ṭha tawk tawh a, goal venhim lamah pawh ṭangkai tak a nih rualin, a ṭul huna ball cross thei a nihna hi a ṭangkai zualna a ni.

Perisic hian Arsenal hmanraw hlauhawm Bukayo Saka a ven a ngai dawn. England international hi ball a chanin a chet ran bakah a tlan pui thei viau a, box chhunga a lakluh ngam ṭhin avangin Perisic tan tlan chhuahsan ngam chi a ni dawn lo - an inveng uluk hlein a rinawm.

Kane vs Gabriel
William Saliba hming a ri ring ṭhin a, tun hnaia Arsenal khelh danah erawh Gabriel chu tlarhnung laia rinrawl leh an innghahna tih ngam a ni.

Brazilian defender hian tharum a ngah a, ball kang a tauh theih bawk, chutihrualin hun pawimawh laia chetsual khut a chin a sim a ngai.

Kane hi striker ven harsa berte zinga mi a ni, box chhunga a hlauhawm bakah box pawn aṭanga goal khung a thiam bawk. Son Heung-min nen an inkawp leh dawn a, anni pahnih aia inkawp rem sawi tur an awm bik lo ang. Kane leh Son-a ball inpe kual tur dangchat turin Granit Xhaka a pawimawh dawn.