Australian Open a lo her chhuak leh dawn ta

Tennis season khat chhungin tournament ngaihhlut bik 'Grand Slam' pali an khel ṭhin, chung zinga a hmasa ber Australian Open 2023 chu January 16 - 29 chhung hian Melbourne Park-ah khelh ṭan a ni leh dawn ta.

Mipa champion lai Rafael Nadal chuan a nomawi humhim tumin inelna a hmachhawn dawn a, hmeichhe singles champion Ashleigh Barty erawhin nikum khan tennis a chawlhsan tawh, kuminah champion thar kan hmu dawn.

Australian Open hi vawi 111 an neihna tur a ni dawn, Open Era chinah chuan a vawi 55-na a ni dawn thung. An khelhna hi hard court (GreenSet) a ni a, ball vaw na leh service nei ṭhate tan hmun nuam a ni leh dawn.

Australia ramah chuan nipui lai a ni a, khaw lum vangin player tam takin inkhelh harsa an ti ṭhin. European player aiin United States lama miten inkhelh harsa an ti deuh ṭhin niin a lang, chuvangin beisei loh result kan hmu leh nawlh nawlh a nih pawhin a mak lo ang.

Roger Federer-a'n season hmasa khan tennis a chawlhsan tawh a, hmeichhe player ropui Serena Williams pawhin nikum September thla aṭang khan tennis a khel tawh lo, anni pahnih tel loa Grand Slam khelh a ni tur hian mi tam tak lung a ti leng ngeiin a rinawm.

Nadal hmabak

Rafael Nadal hian nikum khan Australian Open nomawi a chawi a, hard court inelna liana a champion hian Grand Slam title 21 a nei tling a, a elpui Roger Federer leh Novak Djokovic te a kalsan chiah.

French Open-ah champion zuiin Nadal a kal fal a, mahse Wimbledon title latu Djokovic (21 titles) chuan a rawn hnaih ve leh hret, tun season chu Rafa leh Novak te inelna hi a la ni chhunzawm dawn niin a lang.

Spanish star Nadal chuan, "A nihna tak sawi chuan tun hnaiah ka khel ṭha tawk lo. Australian Open inbuatsaihna ka nei ṭha tawk lo, Sydney khawpuia match hniha ka chak lo ringawt kha chu thil ṭha lo tak niah ka ngai.

"Chutihrualin tournament lianah chuan a boruak a danglam dawn, a tir aṭangin ṭha taka ka khelh theih ngei ka beisei tlat a ni," tiin a sawi a, season dangah chuan inelna tir lamah Nadal hian a khel ṭha tawk lo deuh ṭhin.

Nadal tan Australian Open bik hi vawi 18 a khelhna tur a ni dawn a, nikum bakah 2009 khan a lo champion tawh. Kuminah hian world number 2 ni mah se seeded pakhatna ni chungin a inlan dawn, champion a tum bawk.

Kum 36 mi Nadal chuan, "Tournament ka khel a nih chuan champion ka tum ṭhin, tun ṭumah pawh ka thil tum hi a danglam chuang lo. Novak Djokovic a inlan dawn a, a nihna tak sawi chuan Novak hi champion tura rinkai ber a ni ang," a ti.

Rinkai Novak

Nikum khan Australian Open khel turin Novak Djokovic hi Melbourne khawpuiah a zin lut vek tawh, visa a hmu thei tho tihna a ni. Mahse, an ram sorkar inkaihhruainaah Covid 19 laka invenna vaccine la lo tan Australia ramah zin luh theih a ni lo.

Mipuiin an sawisel nasa a, chawpchilh takin Djokovic hi thawn haw leh hnuhnawh a ni. Kuminah pawh Djokovic hian vaccine a la chuang lo, mahse hri leng vanga kaihhruaina an thlahdul tawh avangin engthawl takin a inkhel thei dawn.

Serbian tlangval Djokovic chuan, "A nihna tak sawi chuan nikum Australian Open leh Covid 19 vaccine chungchang media lama kan hmu hnem lutuk kha chuan lu a tihai thei, infiammi tan chuan rilru chauh ni loin taksa thleng pawhin a nghawng.

"Australian Open 2023-ah hian ka khelh danah nghawng a nei dawn em, chu ka hre lo, nghawng nei loin tun hma ang bawkin ṭha taka ka khelh theih chu ka beisei, chumi tur chuan inbuatsaihna pawh ka nei ṭha tawkah ka ngai," a ti.

Australian Open inbuatsaihna zinga langsar ber - Adelaide International 1-ah Djokovic hi champion hlim a ni, final-ah Sebastian Korda nen inhmachhawnin, a khungpuiin match point a hmu tawh chu a pawtthla leh thei hial.

Melbourne khawpuia inelna an neih turah pawh champion tura rinkai a ni chhunzawm ang, vawi kua ngawt a champion tawhna hmun a nih avangin nikumah inlan lo mah se kuminah a mikhual thut dawn lo, a vawi 10 nan hlawhtlin ngei a tum ang.

Inlan lo langsar

Mipa world number 1 Carlos Alcaraz chu ke hliam vangin a inlan thei dawn lo a, ruahman dan chuan Spanish rawlthar hi February thlaa khelh tur Argentina Open-ah a inlan ang, clay court aṭangin season bul a ṭan dawn tihna a ni.

Kum 19 mi Alcaraz chuan, "Buenos Aires aṭangin season ka ṭan dawn, ka tan chuan hei aia ṭha duhthlan tur a awm chuang lo," a ti a, world number 1 a nih hnua Grand Slam awm leh hmasa ber tur a khel thei lo chu pawi a tih thu a sawi bawk.

US Open champion hlui Marin Cilic pawh a inhnukdawk. Croatian tlangval hi India rama khelh Tata Open Maharastra-ah a inlan a, mahse hliam vangin a khel tluan thei lo, loh theih lohna vangin Australian Open aṭanga a inhnuhdawh a ngaih phah.

Cilic chuan, "Kum 2023 bul ka ṭan dan chu beisei ang a ni lo. Australian Open ka khel thei lo tur hi pawi ka ti takzet, mahse ka taksa hriselna ka ngaih pawimawh hmasak a ngai si, nakkumah kan inhmu vek dawn nia," a ti.

Duhsak taka wildcard an pek Venus Williams pawh a inhliam a, nau a pai tih puangtu Noami Osaka pawh a inlan thei dawn lo. Damdawi hman phal loh chungchanga chhui lai Simona Halep tan hmun a awm lo bawk, hmeichhe player langsar an awm lo nual.

Hmeichhe singles lamah hian champion tur sawi thiam a harsa ṭhin, player langsar ni lem lo rawn chawr chhuak nawlh an awm ṭhin. World number 1 Iga Swiatek chu inlan dawn mah se kar hmasa lawka hliam nei kha a la ni, player dang tan champion theihna kawng a inhawng ang.