Nunez a chiang lo

Liverpool boss Jurgen Klopp chuan a striker Darwin Nunez dinhmun a chian loh thu a sawi a, zanin dar 8:30-a Brighton & Hove Albion an lenhchilh hunah a inlan thei lo mai thei.

Nunez hian tun hnaiah hliam vangin club training a zawm lo a, Klopp chuan, "Kan nghak ang a, a chiang mai ang. Vawiinah a training loh chuan a inlan thei lo ang," tiin nizan khan a sawi.

Hetihlai hian James Milner-a'n training a zawm leh tawh a, Roberto Firmino leh Stefan Bajcetic an la inhliam a, anni bakah hian Virgil van Dijk, Luis Diaz, Diogo Jota leh Arthur chu hliam chawl sa an ni.

Klopp chuan, "Hliam kan ngah a, mahse, hei aia ṭha zawka ti thei tur chu kan ni," tiin tun hnaia an khelh dan a sawi a, Reds hian an league match hnuhnung berah Brentford chu 3-1 in an ngam lo.

FA Cup third round-ah January transfer-a lakluh Cody Gakpo chuan a match hmasa ber a khel a, mahse, Wolverhampton Wanderers nen 2-2 in an inhnehtawk.

Klopp chuan, "Player dang kan lak belh ka ring rih lo. Ka hna chu ka player neihsa hman thiam a ni a, buaina zawng zawng hi transfer hmanga chinfel vek theih a ni lo," a ti a, thlasik transfer-ah an inlei belh dawn lo niin a lang.