Chelsea an tlawm; Félix OUT!

Premier League club Chelsea ṭantute tan mangchhia a reh thei lo - Fulham lakah 2-1 in an tlawm a, an talbuaina lak ata chhanchhuak tura an lakluh Joao Felix chu Blues tana a match hmasa berah hnawhchhuah a ni.

Hliam vanga talbuai Chelsea-in Atletico Madrid aṭanga loan-a an hawh Félix chu bul an ṭantir nghal a, Portuguese forward telna Chelsea goal nawr na sawt mah se Fulham-in goal an khung hmasa zawk.

Chelsea player hlui Willian chuan minute 25-naah a khung a, mahse, a club hlui laka a goal khung hi a lawm lo - Blues tan Kalidou Koulibaly chuan si phurh sut mah se minute 58-naah Felix hnawhchhuah zui a ni.

Felix hian Fulham defender Kenny Tete chu hlauhawm takin a tlawh a, red card pek a ni - match thum a inkhel thei dawn lo! Chelsea chuan Felix hi season tawp thleng atan pound maktaduai 9.7-in an hawh a, thla ruk chhungin £6mtd a hlawh dawn niin an sawi.

Match thum a khelh loh hian Chelsea hian £2.1mtd vel an hloh dawn anga chhut a ni - Blues hian pawisa chauh an hloh lo, Felix hnawhchhuah a nih hnuah Alves Morais chuan Fulham tan a khung ve leh a, 2-1 in Fulham an chak.

Fulham fan-ten Graham Potter chu ban a nih tur thu sak khumin an tih el a, Premier League-a an match hnuhnung pakuaah vawi khat chiah an chak - table-ah 10-na an ni mek a, Potter hoa season tawp an thleng a nih chuan thilmak a ni hial ang.