Badminton Inter School Tournament; Credence Educational Institute an thiam ber

Badminton hmanga Mizoram school hrang hrangte inelna lian ber Samagra Shiksha MBA Inter School Badminton Tournament 2023, chu khelh zawh a ni ta a, Credence Educational Institute, Bawngkawn chu a pumpuia champion hnem ber an ni.

January 9 aṭanga neih ṭan inelna hi January 12 khan a hmawr bawk a ni a, Saron Badminton Club huaihawtin Ramhlun Indoor Stadium-ah inelna hi neih a ni - Mizoram hmun hrang hranga school 20 aṭangin badminton player 69-in inelna hi an hmachhawn.

Tournament hi Primary school, Middle school, High school leh Higher Secondary School level-ah ṭhen hran niin, open leh team a inelna neih a ni. HSS Boys' Singles-ah St. Pauls HSS naupang Iftiar Alom a champion a, HS Boys' open tournament-ah Credence zirlai H. Lalṭhazuala a champion thung.

MBA ranking tournament champion lai Ramngaihzuali pawh Credence aiawha telin, HS Girls' Open championship-ah a champion a, Govt. Mizo HSS naupang Ramdinmawii chu HSS Girls' Singles-ah a thiam ber bawk.

Team inelnaah chuan Centenary School, Dawrpui chu Primary School Girls Team champion an ni a, Credence Girl's Team chu Middle School Team champion an ni bawk.

HSS Boys' Team inelnaah Synod Higher Secondary School chuan champion nomawi an hawn a, hmeichhe lamah Mount Carmel School ten pakhatna an hauh thung.

High School level-a team inelnaah Credence chu mipa lam champion an ni a, hmeichhe lamah Synod HSS-in pakhatna dinhmun an hauh thung a ni.