Quarterfinal-ah Roma an lut

Jose Mourinho enkawl AS Roma chuan Genoa 1-0 a hnehin Italian Cup quarterfinal an lut. Serie A hmahruaitu Napoli leh Cremonese inkhela chak zawk nen semifinal luh an la inchuh leh dawn a ni.

Ningani zan last 16 inkhelah Paulo Dybala chu bul ṭantir a ni lo a, half time-ah dah luh a ni thung. Argentina international Dybala hian minute 64-naah inkhela goal awmchhun leh chakna ni nghal bawk chu a khung.

Dybala hian Gianluca Mancini hnen aṭangin ball a dawng a, amah vengtute a paltlang hnuah angle zim tak aṭangin goal a khung, a laka Roma fans lamin an beisei an thil chu an hmu ngeiin a rinawm.

Mourinho chuan, "Ṭha takin khel mah ila thil eng emaw tih theih loh kan neih chang a awm, chutiang hunah chuan Dybala hian danglamna a siam thei. Player ṭhenkhat hi chuan coach-te hi coach ṭha zawkah min siam thei," tiin a sawi.

Roma hian Pathianni zan dar 1:15 hian Serie A match khel turin Fiorentina an lenchilh zui leh nghal dawn. Ningani zan khan Fiorentina pawh hian Italian Cup last 16-ah Sampdoria chu 1-0 a hnehin quarterfinal an lo inhlangkai ve bawk a ni.