Messi, Neymar leh Mbappe kan hmu dawn

World Cup hnua a vawi khat nan Lionel Messi, Neymar leh Kylian Mbappe te chuan a rualin Paris Saint-Germain tan match an khel thei ve leh dawn ta. Pathianni zan dar 1:15 hian Rennes an lenchilh ang.

Argentina captain Messi hi chawlh pek rei bik a ni a, a hunah Neymar-a'n training zawm mah se hliam tenau a nei. Mbappe hian World Cup final aṭanga ni thum hnuah club training a zawm, mahse tun hnaiah chawlh pek a ni.

Ningani kha chuan player ṭha pathum hian training an nei ho vek tawh a, anni pathum inkhawp hmachhawn hi Rennes tlarhnung tana thil châkawm lo tak a ni ngei ang, league bakah Champions League inbuatsaih nan an hman ṭhin avangin theihtawp an chhuah dawn.

Christophe Galtier-a naute hian Ligue 1-ah hma an hruai mek, an chesual viau a nih ngawt loh chuan an champion a rinawm. Hetihlai hian an duh ber UCL last 16-ah Bayern Munich an hmachhawn dawn, February thlaa khelh tur ni mah se inbuatsaih hma an mamawh.