India-in series an la

Ningani khan India chuan an mikhual Sri Lanka chu wicket liin an hneh a, match thum khelh tura vawi hnih an chak tawh avangin series an la. Match hnuhnung ber hi January 15, Pathianni chawhnu dar 1:30 hian an khel ang.

Eden Gardens-ah Lions-in bul ṭan chhe lo mah se Men in Blue bowler Mohammed Siraj (30/3), Kuldeep Yadav (51/3) leh Umram Malik (48/2) ten wicket an lak theih zarah target an siam sang lo.

Sri Lanka batter Nuwanidu Fernando-a'n half century (50 runs) a siam a; batter dang Avishka Fernando (20), Kusal Mendis (34), Wanindu Hasaranga (21) leh Dunith Wellalage (32) te strike rate a ṭhat hlawm avangin over 39.2-ah thi vek mah se 215 runs an siam pha tho.

India tan target awlsam niin lang mah se match hmasaa che ṭha Rohit Sharma (17), Shubman Gill (21) leh Virat Kohli (4) te an che ṭha chhunzawm lo. Men in Blue hi talbuai hman mah se KL Rahul-a'n thi loin 64 runs a siam a; Shreyas Iyer (28) leh Hardik Pandya (36) ten thlawp ṭha bawkin over 43.2-ah 219/6 runs siamin hnehna an chang.