Atletico-in Depay an ngaihven

Xavi enkawlna hnuaia Barcelona tana inlan phak lo Memphis Depay chuan Atletico Madrid a zawm dawn nia sawi a awm a, he thu buatsaih a nih lai hian thuchiang erawh a la awm lo.

Khawthlang media ṭhenkhat chuan Depay hian Madrid khaw club hi a pan dawn niin an sawi a, hetihlai hian Barcelona sporting director Mateu Alemany chuan Depay chungchang zawhna chu chiang takin a chhang lo.

Alemany chuan, "A chhuah leh chhuah loh chu kan la hria ang chu - kan fixture neih dante thlir ve a ngai. Memphis hi player quality sang tak a ni a, hrem vangin Robert Lewandowski leh Ferran Torres te league match hmabak pahnihah kan chhawr thei dawn lo.

"Heng hi ngaihtuah tel vek a ngai a ni," a ti - Atletico hian Chelsea-ah loan-a Joao Felix an kaltir avangin a hmun ruak luah tur an mamawh a, tun season-a Barcelona tana match li chiah la khel Depay lam an hawi.

Atletico hi tun season-ah an che ṭha lo - La Liga table-ah pangana an ni mek a, Pathianni zan dar 8:45-ah Almeria chu league match khel turin an lenchilh ang.

Barcelona, Real Madrid, Real Betis leh Valencia ten Spanish Super Cup an khelh avangin match an nei lo a, February-ah tun kar an match tur chu club pali hian an khel dawn a ni.