Mizoram Lockdown (inkharkhip) Ni 132

Liverpool midfielder Alex Oxlade-Chamberlain-a'n Premier League-a a club hmasa ber Arsenal tan season ruk a khel hman a, league match 132 inlansakin goal kua a khung. 

Ox-a hian Southampton-ah a career ṭanin League One lamah Saints tan a inlan ṭhin a, season hnih khelin match 43-ah goal 10-a khungsak. Kum 2011 khan Arsenal lam hawiin a puanthuah a tel a, League One club aṭanga Premier League-a a insawn chungin a season hmasa berah inelna hrang hrangah match 26 khelhsakin goal li a khung nghal thei. 

Gunners tan kum 2017 thleng a khel a, 2017-18 season-ah match li a khel hman tihin Liverpool a pan - a man zat hi pound maktaduai 35-a tling. Reds-ah hian match 42 khelin goal nga a khung a, a season hmasa berah hmun pawimawh chang nghal mah se a inhliam avangin a talbuai zui - 2018-19 season-ah a dam hleithei lo a, match hnih a khel ve hram.

Tun season-ah dam lam a pan a, match 43-ah goal riat a khung - a career-a season khata goal a khung hnem ber a ni. England tan vawi 35 inlana goal sarih khungtu hian Reds tan Premier League, Champions League, UEFA Super Cup leh FIFA Club World Cup nomawi a chawi tawh - inelna hrang hrangah match 87 inlanin goal 13-a khungsak. 

Gunners tana khelh laiin FA Cup (3) leh FA Community Shield (3) nomawi a chawi tawh bawk a, London club tan hian inelna hrang hrangah match 198 inlanin goal 20-a khungsak hman a ni.