Manchester khawpui a 'SEN' leh ta

Erik ten Hag-a'n season ṭan hmain Pep Guardiola leh Jurgen Klopp te hun a la tawp ve tur thu a sawi a, a hunlai chuan fiamthu ang chauh a ni. Mahse, Dutch manager hian thu chu a tak ramah a chantir chho mek - Manchester United ṭantute tan lawmna tur a awm leh ta.

Inrinni zan khan Old Trafford-ah Manchester City an lenglut a, Pep-a hote hian Etihad Stadium-a 6-3 zeta an sawp lakah Jack Grealish hmangin an khung hmasa zawk. Goal khat chhuah vangin ETH-a hote an indawm kun lo a, na taka nawrletin Bruno Fernandes leh Marcus Rashford te goal hmangin an lehthal.

Man United hian Man City hi point khat chauhin an pha tawh lo a, Premier League champion beiseina a nun thar bakah inelna dang pathum Europa League, FA Cup leh League Cup-ah an la champion thei vek bawk.

Coach inbeihna
League Cup-a chesual Pep Guardiola-a'n player neih ṭhat bul a ṭantir nghal a, Erling Haaland, Kevin de Bruyne leh tun hnaia che ṭha Riyad Mahrez ten bul an ṭan ṭhap. Tlarhnungah John Stones leh Ruben Dias-te an inhliam avangin Nathan Ake leh Manuel Akanji te an inkawp a ngai thung.

Eithad Stadium-a an mualpho hnuah ETH a inzir ṭha tih a lang. Brazilian midfielder Casemiro leh Fred ten defence an pui a, an hna fel fai takin a duansak. Defence laiah pawh Raphael Varane leh Luke Shaw te an inkawp a, goal ruk chhuah nawn an tum lo.

Man City-in ball an chang tam zawk a, United an inveng thung. Mualneitu lam hian awmze neiin ball an chuh a, team angin 'pressure' an pe. Tlarhma aṭangin defence an inṭan a, phur fâl ṭul loa nawr leh thatchhe fal tlan peih lo an awm lo a, ball an chhuhsak loh player tin an awmna tur an hre zel. Derby hnuhnung bera hattrick siamtu Haaland leh Phil Foden ten goal chance an insiam thei lo.

KDB vengtu Fred
City-in ball chang tam mah se United an inveng thiam a, mualneitu hian ball an chanin awmze neia ball an inpek zel avangin first half-ah an goal bawh a na zawk. United hi an vanneih ṭum ni se first half-ah goal thum khung thei tur an ni.

Fernandes-a'n chance ṭha a hlah hnuah Rashford-a'n ṭum hnih ngawt a hlah. City erawhin United tlarhnung ṭhiah an harsat a, Fred-a'n ball semtu ber Kevin de Bruyne a dah ṭhat miau avangin Haaland leh Mahrez ten ball ṭha a hmu lo.

Ten Hag-a'n Fred-a hna tura tuk sak chu KDB ven a ni a, Brazilian midfielder hian a veng ṭha hle. Chutihrualin Fred-a'n City midfielder a ven dan hi a tui in lai zawng zawnga veng an tih ang kha chu a ni lo - Brazilian midfielder hian KDB hlat si loin United tana ball sem kawngah pawh a ṭangkai pha tho.

Manchester tlangval
Second half ṭantirhah City an chungnung a, United an inveng seng lo. Fred-a'n KDB a ven loh karah Belgian midfielder hian United box chhungah ball changin a cross ball ṭha chu minute 60-naah Grealish a tauh goal.

Etihad Stadium-a an inkhelh ṭumin United ṭantute halftime aṭangin haw tawh a, Old Trafford-ah erawh player-ten huaisen taka an beih let miau avangin an thlawp tlat tawh.

Minute 78-naah Casemiro ball pek chu Fernandes-a'n a pet goal a, Portuguese midfielder goal lawm danah hian a ti tak tak tih a chiang a, a chet dan hian a team-te a tiphur bawk.

Minute li hnuah substitute Alejandro Garnacho thawhrah sengin Rashford-a'n chakna goal a khung. Kum 18 mi Garnacho-a'n a theihna sang tak a lantir a, Rashford lahin goal khung a ban san thei lo. Manchester tlangval Rashford hian World Cup zawhah sarih khelin goal a khung vek a, goal riat a khung tawh.

Hun tawp dawn hnaiah Harry Maguire, Lisandro Martinez leh Scott McTominay te an rawn lut a, goal an chhuah lo. Manchester United-in an hmelma Man City an hneh a, kar laihawlah Crystal Palace an tlawh ang a, Pathianni zanah hmahruaitu Arsenal an hmachhawn zui ang.

A offside lo maw?

Casemiro-a'n minute 78-naah 'through ball' a pe lut a, Marcus Rashford-a'n a um lut. English striker hi offside position-ah a awm a, amaherawhchu ball a khawih hmain Bruno Fernandes-a'n a pet goal.

Assistant referee-in goal a luh rualin offside flag a phar a, United captain Fernandes-a'n a sawisel nghal. Replay-ah Rashford-a'n ball a khawih lo tih chiang takin a lang a, referee Stuart Attwell-a'n goal-ah a pawm.

Man City-in referee thutlukna mak an ti a, Man United an lawm thung.

Football dan chu
Football danah chuan player chu goal luhna tura inrawlh chuan offside tih a ni a, hetah hian dan sawifiahna hrang hrang a awm leh bawk.

Danah hian ball a khawih loh chuan offside loa chhiar theih a ni a, Rashford hian ball a khawih lo. A khingpuite tlan tur a dan emaw a khingpuite nen ball an inchuh emaw chuan offside a ni. Rashford hian amah vengtu Manuel Akanji a dang lo a, City defender nen hian ball a inchuh hman lo bawk.

Mahse, offside danah hian player chet danin a khingpuite chet dan a nghawng em tih a awm tel. Hei erawh inhnialna tur a ni.

Referee Stuart Attwell hian Rashford hi awm lo pawh ni se Akanji hian a dang lo turah a ngaih theih. Mahse, Casemiro ball pek tum chu Rashford niin a lang. English striker hi chiang taka a offside avangin City defender tan inthlah dul a awl khawp ang le.

Eng nge an sawi?
City defender Akanji chuan, "Dik taka sawi chuan goal hmasa ber kha chu fiamthu ang chauh a ni. Rashford kha a offside tih ka hmu a, ka kaltlangtir. Ani khan a tawp thlengin ball a um a, keeper a hmachhawn hnuah Bruno Fernandes kha rawn auin a pet a zawk. Ball chu a khawih lo a, mahse 30 metres vel ball a um - kei chuan offside chiangah ka ngai," tiin referee thutlukna a pawm lo.

Man United manager Erik ten Hag pawhin, "Thil thlen dan kha chiang takin ka hmu thei a, kan khingpuite tlarhnung kha a tibuai a, dan a awm bawk. Kan chunga thleng chu ni se ka lawm miah lo ang. Chutihrualin referee thutlukna pawh ka hriatthiampui," tiin a sawi.

City boss Pep Guardiola chuan, "Marcus Rashford kha a offside a, Bruno Fernandes kha a offside lo. Rashford khan kan keeper leh centre back kha a tibuai. Chu chu thil thlen dan chu a ni a, kan inkhelhna hmun kan hre bawk. Hetiang ang stadium-ah chuan thutlukna siam a har ṭhin," tiin United-in home advantage an neih thu a sawi.