Tlai dar 2:00-ah Aizawl FC Vs Sudeva Delhi

Vawiin chawhnu dar 2:00 hian Aizawl FC-in Chhatrasal Stadium, North Delhi-ah Sudeva an lenchilh dawn.

Mizo club hi an vanduai a, match hnuhnung berah Mohammedan SC lakah point thum hmu tura ngaih an nih tawh laiin Kolkata club-in hun pek belh minute 12-naah si phurh an sut a ni.

Chak a ṭul
Aizawl FC-in an khelh ṭhat aiin point an hmu tam tawk ṭhin lo a, an inkhelh tawhna aṭangin an insiamṭhat a ṭul. Mizo club hian vawiin chawhnua hmachhawn tur Delhi Sudeva hi RG Stadium-ah 2-1 in an hneh tawh.

Chutihrualin Sudeva hi point hnih chauh hmuin table mawngphahah an awm a, chutihrualin fimkhur erawh a ṭul. Delhi club point hnih hmuhna hi Mohammedan leh Real Kashmir lakah a ni a, tun hnai hian coach thar Sankarlal Chakraborty hnuaiah hma an sawn.

Engpawh chu nise, Aizawl FC tan erawh chhuanlam siam a thiang lo. Mizo club hian table chung lama awm an duh a nih chuan Sudeva hi an hneh a ṭul a, hneh thei tur pawhin player an chhe lo.

Tun season Aizawl FC hian rawlthar duhawm tak tak an kawl nual a, I League lama tawnhriat la nei miah lote pawh starting XI-ah an lut phak fo a, Mizo player-te an ring tawkin an chhawr hnem hle.

I League kalphung
Zirtawpni khan AIFF League Committee chuan online meeting an nei a, chairman Lalnghinglova Hmar-in a kaihruai a, I League leh a kaihhnawih thil hrang hrang an rel.

Tun season tawpah I League aṭangin club pahnih an tlahniam dawn a, I League 2 (Second Division League) aṭangin team pahnih an kaisang thung dawn a a; I Leagure 2 boruak a nung sawt ang.

I League aṭangin champion team-te ISL-ah an kaisang dawn bawk nen, tun season tawp aṭangin Indian football division pathum hi a inzawm chiang lehzual tawh ang.

Hetihlai hian All Manipur Football Association-in I League 2 khel tura club an nominate danah thil fel lo a awm avangin tun season-ah Manipur aṭangin I League 2 khel tur club awm lo turin AIFF League Committee chuan a rel a ni.