Lianzuala'n goal a khung leh ta!

Mumbai khawpuia inkhel en hona hmun pakhatah, "Chhangte, Chhangte," tiin football fans an au rual a, Mizo hming lamin an hlim takzet - an hlimna thlentu chu Lallianzuala Chhangte a ni.

Lunglei tlangval hian Inrinni zan khan Indian Super League-ah goal a khung leh ta a, ATK Mohun Bagan lakah Mumbai City chu 1-0 in hnehna a chanpui a, Kolkata khawpuia inkhelah hero of the match-ah thlan a ni bawk.

Mumbai hian tun season ISL match 14 an khelhah tlawm an la nei lo a, table chung ber an luah mek - khelh zat inangah an hnuai chiaha awm Hyderabad aiin point liin an sang zawk - Mumbai lakah hian Bagan tan Kerala Blasters aṭanga lakluh K. Lalṭhathanga (Puitea) chuan inkhel bul a ṭan.

Lianzuala hian tun season ISL-ah match 14 khelin goal riat a khung ta a, assist vawi thum a nei - tun season ISL-ah goal kua khungtu East Bengal striker Cleiton Silva chiah tluk loh a nei mek.

India tana vawi 17 inlan tawh Lianzuala chuan, "Pathian zarah kan kaltluang khawp mai. Top scorer lam ka la ngaihtuah lo a, theihtawp chhuah zel phawt ka duh - min lo ṭawngṭaipui zel rawh u," tiin Vanglaini a hrilh.

Zirtawpni zan khan Jasmhedpur FC chuan 2-1 in East Bengal an hneh a, Kolkata club tan Cleiton chuan goal hmahruai khung mah se Men of Steel hian Harry Sawyer leh Ritwik Das hmangin an chhanglet a ni.

East Bengal tan Lalchungnunga'n inkhel bul ṭanin, Jerry Lalrinzuala chu bench aṭangin a lut a, JFC tan Ricky Lallawmawma, Laldinliana Renthlei leh Laldinpuia Pachuau ten bul an ṭan vek.

Inrinni zan inkhel hmasa zawkah Bengaluru chuan 3-1 in Odisha FC an hneh a, Rohit Kumar, Roy Krishna leh Pablo Perez ten Bangalore club tan an khung a, Odisha tana penalty aṭanga Diego Mauricio khungin awmzia a nei phak lo.

Odisha tan Jerry Mawihmingthanga'n inkhel bul a ṭan a, bench aṭangin Isaac Vanmalsawma a lut bawk.