Champion lai Nadal inlan nghal dawn

Australian Open 2023 chu tukin aṭangin khelh ṭan a ni a, mipa champion lai Rafael Nadal chuan chawhma lamah a match hmasa ber a khel nghal dawn a, seeded pakhatna hian Jack Draper a hmachhawn ang.

Roger Federer a chawl tawh a, hmeichhe player ropui Serena Williams pawh a hun a liam tawh. Tun ṭumah chuan Nadal leh Novak Djokovic te chu mipui mit fukna an ni dawn - Novak erawh Thawhlehniah a inlan ṭan dawn.

Zing dar 5:30 aṭangin match hmasa ber khelh a ni dawn. Nadal hi Rod Laver Arena-a match thumnaah a inlan ang, a inkhelh ṭan hun tur tak hi sawi chian theih a la ni lo, match hmasa rei dan a zirin an ṭan hun a danglam thei.

Grand Slam vawi 22 champion tawh Nadal chuan, "Seeded pakhatna ka ni a, heti chung hian tournament ka khelh tawh zingah chuan first round hautak ber a ni thei dawnin ka hria, chutihrualin beiseina erawh ka nei reng.

"Champion beiseina nen Melbourne Park ka pan a, theihtawp chu ka chhuah leh dawn. Chutihrualin inbuatsaihna tournament ka neih ṭhat tawk loh avangin a huphurhawm angreng hle," tiin a sawi.

Hmeichhe singles champion lai Ashleigh Barty-i'n tennis a chawlhsan tawh a, world number 1 ni lai Iga Swiatek chu champion tura rinkai a ni ang. Polish nula hian ranking leh hlawhtlinna huangah Barty hmun ruak a luah chho deuh zel.

Swiatek hian vawiin chawhnu lamah Jule Niemeier a tum dawn. An inkhelhna tur hi Rod Laver Arena tho a ni a, mipa champion lai Nadal inkhelh zawh hunah Swiatek a inlan chhunzawm ve leh dawn tihna a ni.