Hnehna nena bul ṭan India

Hockey World Cup 2023 khelh ṭan a ni a, inelna thlengtu India mipa team chuan an match hmasa berah Spain chu 2-0 a hnehin tournament bul an ṭan fuh hle, nizan khan England nen an inkhel zui leh a, result kan hre hman lo thung.

Birsa Munda Hockey Stadium-a inkhelah, India tan Amrit Rohidas leh Hardik Singh ten goal khat ve ve an khung a, an goal an venhim theih avangin point thum hlu tak an hlawh chhuak.

Inelnaah hian ram hrang 16 an inlan, India hi pool D-ah England, Spain leh Wales te nen an awm khawm a, an inkhelh kual vek hnuah a chung bera awm chuan quarterfinal an lut nghal dawn, pahnihna erawhin group danga mi an hmachhawn leh phawt a ngai ang.

Hockey Mizoram aiawhin secretary Lalrinfela chuan World Cup hi a hmunah a zuk en. Rinfela chuan, "A thlengtu kan ni bawk a India-in beisei kan nei sang ve khawp mai, a chhe berah semifinal tal chu kan thlen a rinawm," tiin Vanglaini a hrilh.