Tlawmna nun neitu Liverpool an tlawm
Harsat, mangan leh buaina karah pawh an hlapui, "You'll never walk alone" tih hmangin Liverpool fan-te an inhnem ṭhin a, chu hla ropui hmang chuan an innawr kal a, thim zingah pawh beiseina an nei ṭhin.
Mahse, 'Malin i vai ngai lo'ng e' tia lungrualna nena zai ṭhian fan-te meuh pawh an nghing a, coach Jurgen Klopp-a hnar hnuaiah phatna a bo a, captain Jordan Henderson-a'n chhuanlam tur a hre lo.
Inrinni zan khan Liverpool hian Brighton & Hove Albion chu khualmualah 3-0 ngawtin an ngam lo a, champion chu sawi loh, season thara Champions League khelh pawh mang ram a chang ṭan ta.
Klopp chuan, "Kan khel chhia, kan khel chhe takzet," tiin a sawi a, captain Hendo chuan, "Engkim a dik lo," tiin a sawi bawk - chhuanlam tur a awm lo, an khel chhe em a ni!
Reds an zawr
Brighton khelmualah mualneitu an khel ṭha takzet a, first half-a goal chhuah loa chawlhlawk an hmang thei chu Liverpool an vannei - Klopp-a'n a player-te a fuih ngeiin a rinawm a, Reds fan-ten second half ṭha zawk an beisei.
Mahse, beisei ang ngawtin thil a kal lo. Second half ṭan aṭanga minute hnihna lekah Joel Matip a chesual a, a ball pass sual chu Alexis Mac Allister chuan lo chang fuhin, Solly March chuan Liverpool tlarhnung pherh karah goal-ah a chantir.
Liverpool an insiamṭha chuang lo - minute 53-naah March-a bawk kan hmu. Evan Ferguson-a ball pek ṭha zet chu goal mawiah a chantir a, Matip, Trent Alexander-Arnold, Ibrahima Konaté leh Andy Robertson ten an tihtur an ti tawk lo vek.
Reds tan player thar Cody Gakpo chuan chance nei ve mah se goal-ah a chantir thei lo a, Brighton bench aṭanga lut Danny Welbeck chuan mawi zeta Joe Gomez ball a pet khum hnuah, an goal thumna a khung a, Liverpool an tlawm.
Mangan a hun
Klopp-a'n a 4-3-1-2 formation rawn hmangin Alex Oxlade-Chamberlain chu tlarhmaa Mohamed Salah leh Gakpo te thlawp turin a dah a, mahse, player pathum an la inman tawk lo a, Brighton lamin an duhthala hmun awl neih nan an hmang.
Reds goal nawr a na tawk lo a, tlarhnung a pherh takzet bawk. Chhuanlam tur tingin Virgil van Dijk, Luis Diaz leh Diogo Jota an inhliam a, mahse, tun hnaia Reds chetsual chhan en ila, fimkhur tawk loh vanga thleng zel a ni.
Brentford laka an tlawm khan Konate leh Harvey Elliott tihsual an tuar a, FA Cup third round-a Wolverhampton Wanderers nen 2-2 a an inhnehtawk ṭuma an goal chhuah hmasak ber lah keeper Alisson fimkhur tawk loh vang a ni bawk.
Reds captain Jordan Henderson chuan, "Tun hnaiah kan khel fuh hleithei lo a, keimah mai bakah, player dang pawhin an tisual tih an pawm ang - tunah chuan siam ṭhat kan tum a ngai a ni," a ti.
Super Frankie X
Player a nih laia Super Frankie tih hiala hming lem an pek Frank Lampard pawh a 'Super' hleithei lo a, a team enkawl Everton chu Southampton lakah 2-1 in a tlawmpui leh ta - Saints hi table mawngphah luahtu an ni.
Everton tan Amadou Onana chuan goal hmahruai khung mah se, Saints James Ward-Prowse chuan goal hnih hmangin a chhanglet - freekick hmanga a khung chu pui tak a ni.
Goodison Park-ah Everton fan-ten club neitu Farhad Moshiri duh lohna an au pui a, Lampard hma hun pawh a chiang ta lo hle. Season tawp thleng kan hmu lo a nih pawhin a mak lo ang.
Nottingham Forest chuan season hmang chhe tak Leicester City chu 2-0 in an hneh bawk a, an intawn hmasaka 4-0 a an ngam loh team lakah hian Brennan Johnson chuan goal hnih a khung.
