Inter School Cycling Competition a hlawhtling

Mizoram Cycling Association (MiCA) buatsaih 1st Inter School Cycling Competition chu Inrinni khan Ramhlun Sports Complex, Aizawlah tluang taka zawh fel a ni.

Inelna hi Higher Secondary School, High School leh Middle School zirlaite tana buatsaih a ni a, khelmual chhunga tlankawng siam chawpa inelnaah hian Cyclist 30 an tel. Higher leh High School zirlaite chu Lap 4 an intlansiak a, Middle School zirlaite chu Lap 3 an intlansiak thung.

MiCA hian sorkar department hrang hrangte thawhpuiin Rally leh Competition hawhtling tak takin a lo huaihawt tawh a, Mizoram State Sports Council (MSSC) pawhin a pawmpui tawh. Inelna a buatsaih zingah Tour de Hmuifang-in ngaihhlut a hlawh a, Mizoram a adventure leh endurance sports lama inelna langsar a ni phak a ni.