Juve sawptu Napoli an kal fal ta

Serie A hmahruaitu Napoli chuan anmahni rawn ti buai phak tur Juventus chu 5-1 in an lo sawp a, champion lai AC Milan chuan Lecce lakah point khat an hlawhchhuak hram bawk - Naples khaw mipui lawmna a belhchhah ngei ang.

Napoli hian league match 18 aṭangin point 47 an hmu ta a, anmahni hnaih bertu Milan aiin point kua laiin an sang fal ta. Diego Maradona hoa an champion bak kha chu Napoli hi an la champion leh lo a, an legend thih hnuah a sulhnu zui leh theihna remchang an nei mek.

Goal a sur
Zirtawpni zan khan Diego Armando Maradona Stadium-ah Juventus an lenglet a, tun hnaiah Old Lady an chet ṭhat bakah an tlar hnung a phui ṭhat em avangin Napoli tan chetsual a hlauhawm hle a, a bul erawh an ṭan fuh hle thung.

A zawna match riat chak thei, heng match riata goal chhuah miah lo Juventus an inveng thei lo. Victor Osimhen-a'n goal hmahruai a khung bakah Khvicha Kvaratskhelia tan a siamsak a, mikhual lam tan Angel di Maria chuan a sut ṭhen.

Second half-ah Napoli an hlauhawm zual - Osimhen, Amir Rrahmani leh Elif Elmas ten khung belhin, team ṭha Juventus lakah nuamsa takin point thum an hlawh chhuak. Serie A bikah Juve hian kum 1993 May thla hnua a vawi khat nan match khatah goal nga an chhuah.

Juve manager Massimiliano Allegri chuan, "A hmasa berah chuan Napoli kha an khelh ṭhat em avangin kan lawmpui phawt tur a ni ang. Match riat chak zawn hnua chak loh chu a hrehawm, chutih rualin Coppa Italia leh league khelh chhunzawm a ngai," tiin an inbuatsaih nghal dawn tih a sawi.

Napoli captain Giovanni Di Lorenzo chuan, "Danglamna thlentu chu coach Luciano Spalletti hi a ni, ani hian team boruak ṭha tak a siam. Player tam takin min chhuahsan khan tlahniam turah min ngai, mahse a aia ṭha zawkin team kan din," a ti.

Milan an chelh
Napoli an chak tih hresa chungin Inrinni zanah AC Milan an inlan a, nomawi humhim tur chuan chak ngei a pawimawh tih an hria. Mahse, Italian champion hian Lecce laka goal hnih an chhuah hmasa an sut zo thei hram, point khatah an lungawi a ngai.

Minute thumna lekah Milan defender Theo Hernandez chuan an mahni lamah a ti lut, an buaina belhchhah turin Lecce defender Federico Baschirotto chuan an goal hnihna a khung zui a, chawlhlawk laiin Stefano Pioli nauten goal hnih an phur fel der.

Champion lai Milan tan point khat tal sualchhuah a pawimawh, second half-ah Portuguese forward Rafael Leao leh Davide Calabria te hmangin an sut zo a, chak zo ta chiah lo mah se point an hmuh belh hrim hrim avangin lawmna tur a ni ang.

Inkhel dangah Inter Milan chuan striker Lautaro Martinez-a goal khat hmangin Verona 1-0 in an hneh a, season thara Champions League khel turin an dinhmun an sawhnghet chho zel a, an chunga awm Juve nen point 37 ve ve an nei.

Inter coach Simone Inzaghi chuan, "Minute thumna lekah goal kan khung a, a chang hi chuan vannei taka point thum kan hlawh chhuah chang hi a awm, chutiang match chu tun ṭum ami pawh hi a ni," tiin a sawi.