Basque derby-ah Real Sociedad an chak

Spanish La Liga-ah Real Sociedad an kal zel a, champion an sawi ri ngam - Inrinni zan khan Basque derby-ah Athletic Bilbao chu 3-1 in an hneh a, table-ah pathumna dinhmun an luah zui.

Sociedad hian hmahruaitu Barcelona chu match khata khel tam chungin, point ruk chauhin an phak lo tawh a, Barcelona hian nizan khan Real Madrid nen Spanish Super Cup final an khel a, an result kan hre hman lo - he match avang hian club pahnih hian kartawpah league match an nei lo a ni.

Kum 2014 hnua Champions League la khel leh lo Sociedad tan hian Alexander Sorloth chuan minute 25-na lekah goal hmahruai a khung a, Norwegian striker hian tun season-a goal 10 a khungna chiah a ni.

Sociedad hian an la duhtawk mai lo - Japanese winger khel ṭha em em mai Takefusa Kubo chuan a rawn belhchhah ve leh a, 2-0 a ni fel der.

Minute 40-naah Oihan Sancet chuan Bilbao tan beiseina siamsak ve mah se awmze nei lo a chang zui a, Mikel Oyarzabal chuan minute 62-naah penalty hmangin Sociedad chak nemnghehna goal a khung.

Sociedad penalty hi Kubo hlawhchhuah a ni a, Japanese winger titlutu Yeray Alvarez chu hnawhchhuah a nih bawk avangin Bilbao tan hian comeback ngaihna a awm tawh lo.

Hetihlai hian coach thar Jorge Sampaoli hnuaiah pawh Sevilla-in eng ang thei lo a, October 5-a coach Julen Lopetegui an ban hnuah league match sawm khel leh tawhin vawi hnih chiah an la chak - Inrinni zan khan an tlawm leh ta.

Sevilla hian khualmualah Girona chu 2-1 in an ngam lo - mikhual team hian Tanguy Nianzou hmangin goal hmahruai khung mah se, Cristhian Stuani leh Yangel Herrera ten Girona tan an chhanglet a, 2-1 in an chak daih.