Champion tum Arsenal thawm a na!

Premier League hmahruaitu Arsenal chuan Tottenham Hotspur 2-0 in an luhchhuah a, champion lai Manchester City aiin point riatin an sang fal ta - Mikel Arteta nauten nomawi chawi tumin kawng dik an zawh.

Pathianni zan North London Derby inkhelah, mikhual Gunners tan Bukayo Saka-a cross chu Spurs keeper Hugo Lloris-a'n anmahni lamah a tilut palh a, captain Martin Odegaard chuan khung belhin, inkhel hmuhnawm chhawp chhuak chungin point thum an hmu.

Manchester United lakah Citizens an chesual a, hmahruaitu Arsenal hian kal fal theihna remchang an bawhpelh lo. Tun kartawp hian Emirates Stadium-ah Erik ten Hag enkawl United an mikhual dawn, inkhel a pawimawh a, a hmuhnawm khawp ang.

Laipui a puak
Euro 2022 final-a penalty a hlah hnu khan Saka chu Tottenham Hotspur Stadium-ah Spurs fans tam takin an thlawpna thu an lo ziak, tun ṭumah erawh hun a liam leh ta deuh a, club inhal an nih avangin an zia dik tak 'hmelma' thlirin an lo thlir leh ta - thil pangngai a ni.

England international hian ball a chan apiangin a hlauhawm chinah lakluh a tum deuh zel. Fans lamin nasa taka an auhel Thomas Partey-a'n tihsual a nei zauh zauh a, mahse Saka tana through ball duhawm petu chu Partey tho a ni.

Mual sir aṭangin Saka-a'n ball a lalut a, a cross hi harsa vak loa man theih tur ni mah se Lloris a chesual a, anmahni lamah a lut daih.

Antonio Conte naute an buai zui - Partey-a'n kawh zeta goal ban a tih per bakah Odegaard khung tur chu Lloris-a'n a lo dang hram.

Xhaka leh Partey-te hmaa ding Odegaard-an nuam titakin a theihna a lantir a, ball a sem kual bakah inkhel a cheimawi tel. Chawlhlawk hma deuhin Real Madrid midfielder hlui hian box pawn aṭangin an goal hnihna a pet lut, keeper tan dan phak a ni lo.

Spurs an chuai
Harry Kane, Son Heung-min leh Dejan Kulusevski te tlarhmaah an intlar a, anni pathum hi Premier League chauh ni loin European league dangah pawh ni se hmatawng hlauhawm tak tur chu an ni phak - Arsenal tlarhnung pawh an tibuai zauh zauh.

Goal khat an phurh hnuah Son-a'n hnai takah remchang a nei a, mahse a hun taka rawn tawlh hma Aaron Ramsdale a paltlang thei lo. English goalkeeper hian Kane-a tauh tawih zet mai pawh a lo dansak daih, a hna a tlin viau.

Second half-ah Tottenham lamin goal chhuah belh huamin an nawr let. Counter attack aṭangin Kane bawkin remchang a hmu, mahse a shot ṭha zet chu Ramsdale-a'n a chhuah duh tlat lo, a hnua Ryan Sessegnon pet pawh a lo dansak hram.

Conte-a'n danglamna beiseiin Richarlison a dah lut a, mahse awmzia a nei thui lo - Arsenal keeper Ramsdale chet ṭhat zan an tawng miau a, Spurs-in goal an khung thei lo - season thara Champions League khelh phak erawh an tum ngam ang.

Derby boruak chu...
North London club pahnih Arsenal leh Tottenham-te hi club inhal tak an ni a, an inkhel boruak a nung ṭhin hle. Pathianni zanah pawh Premier League boruak lum tak kan hmu, inkhelh zawh thlengin pawh ṭhen ngai khawpa che an la awm.

Bench aṭanga lut Richarlison khan si phurh sut ngei a tum a, a thiamna bakah tharum a hmang nasa. Mahse, hliam dam hlim a ni a, defender Gabriel khan Brazil tana a khelhpui ni mah se a lo dim hran lo, a dinpui William Saliba pawhin a lo dimdawi chuang hek lo.

Arsenal keeper Aaron Ramsdale leh Richarlison ten hun tawp dawnah buaina an nei zui a, khelmual sira Tottenham ṭantu pakhat chuan Ramsdale hi lo va pet a tum, buaina lian tham a chhuah hmain vengtu (security) lamin an chingfel.

Ṭhiante chhan ti na tak Granit Xhaka a inrawlh hman, fans bakah Spurs player thlengin Swiss midfielder hian vai hma a duh emaw tih mai tur a ni. Mahse, Gunners manager Mikel Arteta chuan Xhaka hi a khap dai thei hram.

Ramsdale chuan, "Spurs ṭantute khan inkhelh chhung zawngin buaina min siamsak a, inkhelh zawh hnuah ka'n siamsak ve zauh a nih kha. Infiammi te chuan ṭawngkam leh chezia a intih el chang kan nei, fan pakhat erawh kha chuan kut min thlak a tum," a ti.

Hamrik hnuhnung a rik chiah khan Ramsdale hian a kawr hmaa Arsenal 'badge' chu a fawp a, a hma deuh hian Richarlison a nuih bakah, inkhelh zawh rualin Spurs ṭantute bula a tui bottle chu va chhar kher a tum, fans ṭhenkhat chuan an ngaithei lo hle a ni.

Tottenham chuan an fans zinga tharum thawh an awm chu pawi an ti a, tharum thawhna chu football huangah tel lo se an duh tih an sawi. Football Association pawhin fans chet dan an dem a, hma la turin Spurs an hriattir bawk.