An phu ang ngeiin Aizawl FC an chak ta

Aizawl FC-in nimin tlai khan table mawngphaha awm Sudeva Delhi chu Chhatrasal Stadium, North Delhi-ah an lenchilh a, 2-1 in an hneh.

Mizo club hian point thum hlu tak an hlawhchhuah avangin point 17 an hmu a, pasarihnaah awm mah se pakhatna RoundGlass Punjab nen an inkarah point ruk chauh a awm - beiseina a nung thar zel.

Nimin chawhnu inkhelah hian first half-ah goal a lut lo a, second half-ah inkhela chungnung zawk Aizawl FC-in Henry Kisekka hmangin goal an khung.

Kisseka hian Moham-medan lakah goal hnih a khung a, match hnuhnung pahnihah goal thum a khung avangin Ugandan forward hian a theihna a lanchhuahtir ṭanah a ngaih theih.

Kisseka hian season tir lamah beisei a phak lo a, Rajiv Gandhi Stadium-a inkhel ṭhenkhatah pawh an chak loh chhanah leh an chak zawh loh chhanah mawhpuh theih khawpin a hlah ho ṭhin a, tun hnaiah a thiam a lantir ṭan ta.

Mizo club tan Mizo player-te an inlar zui a, R. Ramdinthara siamsak chu Lalchhanhima Sailo-in minute 70-naah a khung.

Sudeva-in Hriivei Carlos Pao hmangin minute 86-naah siphurh sut ṭhen mah se Mizo club an chesual nawn tawh lo a, goal an chhuah belh loh avangin 2-1 in hnehna an chang.

Aizawl FC hian Mizo player an chhawr rim chho zel a, nimin inkhelah pawh hian starting 11-ah player pariat hi Mizo an ni - Muansanga'n goal a veng leh a, tlar hnungah Adinga, Buanga leh captain Chhawnkima bakah Japanese centre-back Akito Saito-te an awm.

Midfield-ah Chhanhima leh Champhai midfielder Ramsanga bakah Matías Verón-te an awm a; tlar hmaah Kisseka kiangah Tharpuia leh Amawia-te'n bul an ṭan a ni.

Vawiin chawhnu dar 2:00 hian Mizo player-in hmun pawimawh an channa RoundGlass Punjab-in an hnuai chiaha awm Sreenidi Deccan an hmachhawn dawn. Team pahnih inthlauna hi point khat chauh a ni a, tun season-a pakhatnain season tharah Indian Super League khelh dawn avangin an inkhel tur hi a pawimawh hle.