Xavi-a nomawi hmasa ber El Clasico-ah ngat!

Xavi enkawlna hnuaia a vawi khat nan Barcelona-in champion nomawi an chawi a, nomawi chawi tura an hneh hi Real Madrid kher an nih avangin Xavi leh Barca tan a parzu a thlum lehzual ang.

Pathianni zan khan Spanish Super Cup final khelh a ni a, Barcelona chuan 3-1 in Real Madrid an hneh - Catalan club tan Gavi, Robert Lewandowski leh Pedri ten goal khat ṭheuh an khung a, Real tana Karim Benzema goal khungin awmzia a nei phak lo.

Barcelona-in hnehna an chan avangin inelna hrang hrangah match kua zet chu a zawnin tlawm an nei ta lo a, Catalan club tan tunlai chu 'Krismas' ang char char a la ni rih!

Xavi enkawl team hian La Liga-ah pawh hma an hruai mek a, anmahni hnaih bertu Real Madrid aiin khelh zat inangah point thumin an sang zawk - Carlo Ancelotti tan ngaihtuahna sen thar a ṭul.

A harsa lo
King Fahd International Stadium, Riyadh-ah Spanish Super Cup final en turin mipui 57,340 an pungkhawm a, El Clasico a nih miau avangin khawvel mipui ngaihven a hlawh hle bawk.

Beisei ang ngeiin inkhel a hmuhnawm a, goal hmu turin nghah rei a ngai lo - minute 33-na lekah Gavi chuan Lewandowski siamsak chu goal-ah a chantir a, Barca an lam.

Real Madrid an insiamrem hman lo - chawlhlawk hma lawkin Gavi hian a goal khung tur siamsaktu Lewy chu duhsakna a hlan let ve thung a, Polish striker khung tur a siamsak.

Chawlhlawk hman a nih meuh chuan 2-0 in Barcelona-in hma an hruai fel der tawh a, Riyadh khawpuiah Barca an chungnung a, Real an che hleithei lo a ni ber.

A chiang hma
Chawlhlawk hman a nih hnuah Real ṭantuten Real ṭha zawk hmuh an inbeisei a, an beiseina tithlawn tur erawhin Barca-in hun an nghak rei lo - minute 69-naah Pedri chuan Barca tan a khung ve leh!

Minute 21 vel a la awmin Barca-in 3-0 in hma an hruai fel der a, a tawi zawnga sawi chuan champion tur kan hre hma - thilmak danglam thleng tura beisei tan lo chuan Real 'comeback' beiseina chi a ni tawh lo.

Mahse, Spanish champion hian goal khung miah lo a Spanish Super Cup final mangṭha erawh an duh bik lo a, hun pek belh minute thumnaah Karim Benzema chuan goal a khung ve.

French striker goal khung hi scoreline timawitu mai a chang zui a, kum 2018 hnua a vawi khat nan Barca-in Spanish Super Cup nomawi an chawi ve leh ta - Xavi hnuaia Barca kan hmu ṭan e!

Gavi a thiam
El Clasico-ah meuh pawh Gavi-a'n boruak sang a ngam ve tawk tih a pholang a, a che vel a hmuhnawm a, goal a khung bakah Barca tana goal hnih dang kha a assist ve ve a ni bawk - Real player-ten an chelh meuh lo a ni ber.

Gavi hian goal a khung khan Spanish Super Cup-a goal khung naupang ber record a siam nghal a, amah enkawltu Xavi record ding reng chu a khum - kum 18 leh ni 163 mi a ni a, Ansu Fati hnua El Clasico-a khung thei naupang a ni bawk.

October 2020 khan Fati hian record a lo siam tawh a, kum 17 leh ni 359 mi niin El Clasico-ah goal a lo khung tawh a ni - Barca goal thumna khungtu Pedri pawh kha kum 20 mi chauh a la ni!

Xavi hnuaiah Barca rawlthar an vul a, nomawi hmasa ber an chawi ta - nomawi dang tam takin a zui an beisei ngei dawn a, kawng awlsam erawh a ni dawn lo.

Real an vannei
Final-ah a tlawm zawk an ni a, heti chung hian Real vanneih thu tarlan a ngai - Barca-in inkhel an thunun a, Madrid khaw club-in goal tam zawk an chhuah lo kha goalkeeper Thibaut Courtois hnena lawmthu sawi tur an ni.

Belgian keeper hian Lewan-dowski khung ngei tur nia lang chu ṭha takin a dang a, Ousmane Dembele chance neih a dansak pawh keeper ṭha mi tihawm renga mawi a ni - Real an vannei.

Real hian an league match hnuhnung berah Villarreal chu 2-1 in an ngam lo tawh a, Spanish Super Cup semifinal-ah penalty hmangin Valencia an hneh hram a, final-ah an hmelma Barca an ngam lo zui.

Carlo Ancelotti-a'n an tihsual uluk taka a zir thar a ṭul a, team indinthar mek Barca hmaah Real an thamral chho zel mai ang tih chu Madrid khaw club ṭantute thil hlauhthawn a ni ta.

Barca khan min nghaisa anga kan sawi dawn chuan Real Madrid zah lohna ang hial a ni ang. La Liga lama kan lo hneh (3-1, Oct. 16) tawh ang khan min hneh ve a ni mai. Keini aiin an khel ṭha zawk a, chak an phu a ni - chu zawng chu a ni e.
- Carlo Ancelotti, Real Madrid manager

Hnehna kan chan dan avang khan ka lawm a ni. Hnehna chang pawh ni ila, ka ruahman anga kan khelhchhuah loh hi chuan ka lawm a kim ṭhin lo - kan midfielder-ten an tih tur an hria a, engkim kha kan ruahman angin a kal a ni. Ka nauten chak an duh a, ka lawmpui takzet.
- Xavi, Barcelona manager