Potter-a hote an chak ve ta

Kum 2023-ah Chelsea-in chak hmel an hmu ta a, Pathianni zan khan Kai Havertz-a goal hmangin Crystal Palace 1-0 in an hneh. Blues hian match 19 aṭangin point 18 an hmu a, table-ah 10-naah awmin an chung chiaha awm Liverpool nen an point hmuh zat inang mah se Reds hi match khatin an khel tlem zawk.

Graham Potter hnuaiah Blues-in result ṭha an nei thei meuh lo a, Eagles an hneh hmaa an chak hnuhnun ber chu Bournemouth niin December 27 daih tawh kha a ni. World Cup vangin November-ah Premier League match hnih chauh a awm a, Blues hi an chak lo ve ve. London club hian chak an harsat avangin tun ṭuma Patrick Vieira hote an hneh hi result lawmawm bik a ni.

Stamford Bridge-ah Chelsea-in inrintawkna an nei lo tih a lang a, Eagles midfielder Michael Olise ball pet ṭha zet chu keeper Kepa Arrizabalaga-a'n ṭha takin a dang.

Chelsea an insiamrem a, an goal bawh a nat avangin chance ṭha an nei a, Thiago Silva, Kai Havertz, Lewis Hall leh Hakim Ziyech ten an khung teuh hle. First half-ah goal a lut lo a, second half-ah Blues an vanduai reng lo.

Minute 64-naah dinglam aṭanga Ziyech-a cross ball ṭha zet chu Havertz-a'n a tauh goal. German forward Havertz hian goal a khung hnuah hnai tak aṭangin a tauh goal lo. Chelsea-in

goal hnihna an khung theih loh avangin hahdamin an awm lo a, point thum hlawh chhuak turin keeper Kepa puihna an mamawh bawk. Spanish keeper hian Cheick Oumar Doucouré-an box pawn aṭanga ball pet chu ṭha zetin a dang.

Chelsea boss Graham Potter chuan, "Point thum kan hlawhchhuah avangin kan lawm. Khelh ṭhat reng hi thil theih a ni lo a, tun ṭuma kan khelh dan erawh a ṭha thawkhat viau. Ka nauten an thawhrim rah an seng," tiin a sawi.

Blues hian player inhliam pakua bakah an player thar Joao Felix chu hrem vangin an chhawr thei lo. Inhliam vanga an buai laia point thum an hlawh chhuak thei a pawimawh hle.