A bul ṭan nan Nadal a chak

Rafael Nadal chuan Australian Open nomawi a kawl lai humhim a tum a, nimin khan a match hmasa ber khelin Jack Draper chu 7-5, 2-6, 6-4, 6-1 in a hneh. Nilainiah Mackenzie McDonald nen second round an khel leh ang.

Rod Laver Arena-a inkhelah Nadal-a'n a sawi lawk ang ngeiin thil a awlsam lo. British rawlthar, kum 21 mi Draper a khel theiin Nadal tan hna hautak a siamsak hnem hle, mahse darkar thum leh minute 41 an khelh zawh meuh chuan tawnhriat nei hnem zawk a chak.

Champion lai Nadal chuan, "First round-a hmachhawn theih zingah chuan ka khingpui kha a harsa ber hialin ka ring. Draper khan tharum a ngahin theihna a nei bawk, hmabak êng tak a nei," tiin a hneh tak player a fak hle.

Australian Open 2023-ah hian world number 1 Carlos Alcaraz a inlan thei lo a, hei vang hian Nadal chu seeded pakhatna pek a ni. A hmachhawn leh tur world number 65 Mackenzie McDonald lakah pawh rinkai zawk a ni ang.

Nimin inkhel dangah, seeded pathumna Stefanos Tsitsipas pawhin fiahna a paltlang. Greek tlangval hian Quentin Halys chu 6-3, 6-4, 7-6 (8-6) in a hneh hram. Set hloh loa chak ni mah se, inkhel a hmuhnawmin an inchai tawk hle.

Tualchhung tlangval Nick Kyrgios erawh a khup hliam vangin a inhnukdawk. Kyrgios hi vawiinah Roman Safiullin nena inkhel tur ni mah se, nimin khan a hliam vanga a inkhelh theih loh tur thu hi a tichiang.

Vawiin tlai hian Novak Djokovic a inlan ang. Serbian star hi Australian Open nomawi vawi kua ngawt chawi tawh a ni a, champion tura rinkai pawh a ni - a match hmasa ber atan Roberto Carballes Baena a tum dawn a ni.