Chelsea-in Arsenal lak tum Mudryk an lalut

Premier League hmahruaitu Arsenal-in January transfer-ah Gabriel Jesus thlak nan Mykhailo Mudryk lakluh tumin theihtawp an chhuah a, Ukraine international pawhin Gunners pan a duh. Amaherawhchu Chelsea an rawn lang a, sum an thehchhuah huai zawk avangin Mudryk hi an chang ta zawk.

Chelsea chuan Crystal Palace nena an inkhelh hmain Shakhtar Donetsk aṭanga an lakluh an player thar Mudryk chu Stamford Bridge-ah an tlangzarh. Blues hian Mudryk mana an sum seng tur hi pound maktaduai 89-ah a pung chho thei hial a, Ukraine ram pawn club-a la khel lo player manah chuan a sang vah vah hle.

Kum 22 mi Mudryk hian Stamford Bridge-ah kum riat leh a chanve contract a ziak. Chelsea hian euro maktaduai 70 (£62m) an pe phawt ang a, a chet ṭhat dan a zirin euro maktaduai 30 (£27m) an pek belh leh ang.

Mudryk chuan, "Chelsea-a ka lut thei hi ka lawm. Club lian tak a ni a, hmachhawp ṭha tak an nei a, ka career-a hun pawimawh lai taka hetiang club ka zawm thei hi a phurawm hle," tiin a sawi.

Ukrainian forward hian Shakhtar tan tun season-ah league match 12 aṭangin goal sarih a khung a, June 2022 khan ram tan khel ṭanin Ukraine tan vawi riat a inlan tawh.

Graham Potter chuan, "Player hmabak nei êng tak a ni a, goal hmaah a hriam hle. A tlan chak a, a goal bawh a nat avangin mipui pawhin an lawm ang," tiin an player thar chungchang a sawi.

Mudryk hi Arsenal nena sawizawm a ni a, Emirates Stadium pan ngei tura ngaih a ni tawh. Amaherawhchu Inrinni khan Shakhtar club president Rinat Akhmetov leh Chelsea club neitu zinga mi Behdad Eghbali te an inkawm a, Mudryk-a'n sum hmang huai zawk Blues a pan.

Chelsea hi nikum May thla khan American sumdawng hausa Todd Boehly-a'n a lei a, player lei nan pound maktaduai 400 chuang an seng tawh. Tun January transfer-ah ringawt pawh Joao Felix chu loan hmanga an lak bakah Benoit Badiashile, David Datro Fofana leh Andrey Santos te an nghetin an la tawh bawk.

Arsenal erawhin tum chiang tak an nei a, uchuaka player lakluh an tum lo. Mudryk hma hian Dusan Vlahovic, Raphinha leh Lisandro Martínez te chu an lei duhna an tihsan loh avangin an la tawh lo a ni.