Liverpool tan insiamremna hun ṭha a her chhuak
Premier League-ah Liverpool an mualpho a, FA Cup kaltlangin zaninah insiamremna remchang an nei dawn - chhawr thei tak ang maw?
A nihna takah chuan zanina Liverpool inkhel tur pawh hi a tira an tih ṭhat tawk loh rah a ni - FA Cup third round-ah Wolverhampton Wanderers chu awlsam taka hneh tura ngaih ni mah se an hneh zo lo.
Anfield-ah ngei 2-2 in an inhnehtawkpui a, an elpui team ṭhenkhat an hahdam laiin zaninah replay an khelh a ṭul phah. Liverpool tan tlawm a thiang tawh lo a, zanin hi insiamṭhat hun a ni.
Premier League club dang zinga replay khel tur Leeds United chu Nilaini zan dar 1:15 hian an inlan dawn bawk a, Cardiff City an mikhual dawn.
An zawr
Liverpool hian an league match hnuhnung berah Brighton & Hove Albion chu 3-0 ngawtin an ngam lo a, an tlawm a ni satliah mai lo a, an mualpho - coach Jurgen Klopp chuan Liverpool boss a nih hnua an khelh chhiat ber ṭum a nih thu a sawi hial.
Klopp chuan, "Engtinnge kan buaina hi ka sawi theih ang? He player-te tho hian hmanni lawk khan game hmuhnawm tak min chhawpsak a, mahse, kan thawhho ṭhat tawk loh chuan hetiang hian thil a thleng thei a ni," a ti.
Liverpool hi inelna hrang hranga an match hnuhnung pathumah an chak zo lo vek - Brentford (3-1), Wolves (2-2) leh Brighton (3-0) lakah an mualpho. Tlarhnung a pherh a, tlarhma a hriam chuang lo a, midfield an hawihai.
Reds captain Jordan Henderson chuan, "Inrintawkna kan tlachham em em a, kan thathona a bo zo. Theihtawp kan chhuah a ngai a, nakinah ni loin, tunah kan thlak theih ka beisei," a ti - 'tun' chu zanin hi a ni!
Tichuan
Zaninah Klopp-a'n eng angin nge player a rem ang, tih chu zawhna awm thei a ni. Inrinni zanah Reds hian Chelsea an mikhual dawn a, he inkhel tur ngaihtuah chung hian Klopp-a'n player a siksawi a ṭul ang.
Reds hian hliam vangin Virgil van Dijk, Arthur, Luis Diaz, Roberto Firmino leh Diogo Jota an chhawr thei dawn lo chiang a, anni piahlamah hian player neih ṭhat thawhchhuahpui chi a ni ang em, tih chu zawhna awm a ni.
Liverpool tan Darwin Nunez-a'n Brighton a la hmachhawn thei lo a, Uruguayan forward hi Wolves laka enchhin ai chuan Klopp-a'n chawlh hahdamtir a thlang rih zawkin a rinawm.
Chuti a nih chuan tun hnaia inkhel chau lo Fabio Carvalho-a'n bul a ṭan theih a rinawm lo a, Mohamed Salah leh Cody Gakpo hi dah ṭhat ṭul viau mah se Liverpool tana match pawimawhna thlirin, dah ṭhat ngam chi an ni lo mai thei.
Inlan tur dang
Wolves nena an inkhelh hmasaka chesual Alisson hi Klopp-a'n bench-ah a dah ngam ang em, tih chu zawhna awm thei a ni bawk a, Joel Matip leh Andy Robertson chawl hahdamin, Trent Alexander-Arnold, Joe Gomez, Ibrahima Konaté leh Konstantinos Tsimikas te chu tlarhnungah bul ṭan tura beisei an ni.
Brighton lakah midfielder Fabinho a hmuhnawm lo a, Jordan Henderson leh Thiago Alcantara ten eng ruai an ang lo - anni ho hi chawl hahdam rih tura duhtu an tam zawk a rinawm a, chuti a nih chuan Naby Keita, Harvey Elliott leh hliam damkawr Stefan Bajcetic te tan chance a awm thei ang.
Wolves hian Liverpool nen an inhnehtawk hnuah, League Cup quarterfinal khelin, Nottingham Forest chu penalty-ah an ngam lo a, mahse, league-ah insiamṭha zuiin, West Ham chu 1-0 in an hneh.
Mahse, Wolves tan hliam Diego Costa dinhmun a la chiang lo a, Hammers laka inlan lo Goncalo Guedes erawh chawlh hahdamtir a nih avangin zaninah a inlan a beiseiawm thung - a tawi zawngin, zanin inkhel a hmuhnawm ang.