Sri Lanka lakah India an vul

Pathianni khan India chuan mikhual Sri Lanka chu 317 runs tehmeuhin an hneh a, ODI series chu 3-0 in an la. Greenfield Stadium, Trivandrum-ah Virat Kohli leh Shubman Gill ten century an siam ve ve a, 390 runs an siam laiin an khingpui Lions hian 73 runs chauhin an chhanglet. ODI match-a insawpna nasa ber a ni.

Men in Blue hian ODI match hmasa pahnihah hnehna an chang a, match thumnaah batter-te an che ṭha hle. Captain Rohit Sharma-a'n 42 runs siamin a kawppui Shubman Gill-a'n 116 runs a siam.

Virat Kohli a che ropui leh a, ball 110 lekah 166 runs siamin a dam tluan bawk. Kum 34 mi Kohli hian ODI-ah century vawi 46 a siam tawh a, Sachin Tendulkar (49 century) siam turin vawi thum chauh a mamawh tawh a, record thar a siam ngei a rinawm hle.

India hian over 50-ah 390 runs an siam a, wicket nga chauh an hloh avangin Sri Lanka tan umphak rual a ni lo. Lions bat hun a thleng a, Mohammed Siraj lakah an thamral.

Siraj hian wicket li a la a, 32 runs chauh a pe. Mohammed Shami leh Kuldeep Yadav ten wicket hnih ve ve an la a, Sri Lanka batter zingah 20 runs siam tling an awm lo.

India hian Sri Lanka lakah chiang takin hnehna an chang a, Kohli chu player of the series-ah thlan a ni. Men in Blue hian January 18, Nilaini aṭangin New Zealand nen ODI an khel lehnghal ang.