NorthEast United leh Goa inhnehtawk

Pathianni zan khan Indian Super League inkhel a awm a, NorthEast United chuan tun season-a a vawi hnih nan point an hlawh chhuak - FC Goa nen 2-2 in an inhnehtawk.

Goa hian Edu Bedia leh Iker Guarrotxena hmangin vawi hnih ngawt hma an hruai a, mahse, Highlander hian Wilmar Jordan-a penalty vawi hnih chhuih luh hmangin an chhanglet ve ve a ni.

Edu Bedia-a'n goal hmahruai a khung hnuah Brandon Fernandes handball vanga an penalty hlawh chu NorthEast United tan Jordan chuan goal-ah a chantir a, si phurh a sut.

Mahse, hlim chhung a rei lo - Highlander defender Mirshad Michu chuan Noah Wail Sadaoui titluin penalty a chawi ve leh a, Goa tan Guarrotxena chuan goal-ah chantirin 2-1 a ni.

Mahse, minute 71-naah penalty bawk kan hmu. Pragyan Gogoi-a ball lalut tur chu Goa centre back Mohamed Fares Arnaout chuan titlu ve lehin penalty a chawi a, Jordan chuan tun season match riat a khelha a goal ngana ni turin a khung ve leh a, 2-2 in inkhel a tawp - Goa hi match ruk chu a zawnin an chak zo ta lo.

NorthEast United tan Rochharzela chu bench aṭanga luhtir a ni a, FC Goa tan Ayush Chhetri chuan inkhel bul a ṭan bawk.