Raducanu a chak nuamsa

Australian Open chu nimin zing aṭang khan khelh ṭan a ni a, hmeichhe singles huangah Emma Raducanu leh Coco Gauff ten hnehna an chang. Tleirawl duhawm pahnih hi second round-ah an inhmachawn chhunzawm ang.

Melbourne Park-a inkhelah Raducanu hian Tamara Korpatsch chu 6-3, 6-2 in a hneh; German nula laka chak tur hian darkar khat leh minute 25 bak hun a mamawh lo, harsa vak loin hnehna a chang tihna a ni.

British tleirawl hi January thla tir khan Australian ramah hian a zin lut tawh, mahse Australian Open inbuatsaihna tournament a khelh laiin a inhliam. A kerek hliam vang hian hlauthawng deuh mah se, a match hmasa berah chuan harsatna a thlen lo.

Inkhel dangah Coco Gauff chuan Katerina Siniakova chu 6-1, 6-4 in a hneh. Kum 18 mi Gauff hi seeded pasarihna a ni phak a, a match lehpeka a hmachhawn tur Raducanu erawh season hmasa a hman ṭhat loh avangin world number 77 a ni mek.