Champion lai PSG hnehtu Rennes

Ligue 1 champion lai leh hmahruai mektu ni bawk Paris Saint-Germain chu Rennes lakah 1-0 in an chak lo. PSG hi table chung berah an la awm a, mahse pahnihna Lens nen an inthlauhna chu point li chauh a ni ta.

Pathianni zan French Ligue 1 inkhelah, mualneitu Rennes chu a khel ṭha zawk an ni a, minute 65-naa captain Hamari Traore goal khung chu point thum hmuh nan a tawk, player ṭha rual neitu PSG lamin a chhanletna tur an nei lo.

Lionel Messi leh Neymar ten inkhel bul ṭan mah se an hlauhawm tawk lo a, bench aṭanga lut Kylian Mbappe chuan hun tawp dawnah remchang nei mah se crossbar hrulah a thlawh chhuak.

Kum thar ni zan khan PSG hi Lens lakah an lo tlawm tawh, tun hnaiah khualmuala league match an khelh hnuhnung pahnihah an chak lo tihna a ni, coach Christophe Galtier-a'n an buaina chinfel dan tur a ngaihtuah ran a ngai ang.

PSG coach Christophe Galtier chuan, "World Cup khan min la nghawng niin a lang, chuvangin rang taka kan insiamṭhat a ngai. Tuna kan chak lohna hi harh thar nan kan hmang tur a ni ang, season tir lama kan game ang kha neih let kan mamawh," a ti.

Inkhel dangah AS Monaco tan Wissam Ben Yedder chuan minute 14 chhung lekin hattrick a siam a, a team AS Monaco chu Ajaccio lakah 7-1 in hnehna a chanpui. Breel Embolo-a'n goal hnih khungin Axel Disasi leh Krepin Diatta ten an khung ve bawk.