Newcastle tan Isak

Newcastle United tan nipui bazara an lakluh Alexander Isak-a'n Pathianni zan khan Fulham lakah goal pawimawh a khung a, Magpies hi 1-0 in an chak. Eddie Howe-a hote hi table-ah pathumnaah an awm a, season thara Champions League khel thei tur zinga mi an ni.

St. James' Park-ah Newcastle khel ṭha zawk mah se Fulham-in goal khungna remchang an nei ṭha zawk. London club forward Bobby Reid chuan Kieran Trippier lakah penalty a hlawh chhuak a, Aleksandar Mitrovic chuan goal-ah chantirah inngai mah se a ke dinglamin vei lam pet per avangin pawmsak a ni lo.

A tawpah Newcastle United an vannei ta zawk a, Callum Wilsom-a ball pek chu goal ruakah Isak-a'n a tauh goal. Magpies history-a player manto ber (£60m) Isak hian September thla khan international break laiin a inhliam a, kuminah a rawn let chauh.

Howe-a'n Isak hi dimdawih takin a chhawr a, FA Cup-ah Sheffield Wednesday nen bul ṭantir mah se first half bak a khelhtir lo. Premier League match hnuhnung pahniha Leciester City leh Fulham an hneh ṭum pawhin Isak hi a belhkhawmin minute 31 chauh a inlan a ni.