Man United - Arsenal hmain Palace phawt
Premier League champion lai Manchester City hnehtu Manchester United chuan zanin dar 1:30 hian Selhurst Park Stadium-ah Crystal Palace an hmachhawn dawn. Erik ten Hag-a hote hian January 22, Pathianni zanah league hmahruaitu Arsenal an lenchilh lehnghal ang.
Man United hian Gunners hi point kua chauhin an pha lo a, match 20 ngawt khelh tur a la awm avangin champion beiseina a nung thar. Chutihrualin an khingpui tur Palace coach hi Arsenal legend Patrick Vieira a ni a, Eagles leh Gunners hi an hneh loh zawn a nih ngat chuan nomawi beiseina hi a thamral nghal thei thung.
United thar
Erik ten Hag hnuaiah Manchester United-in season bul an ṭan chhia a, Brighton laka an tlawm hnuah Brentford-in 4-0 in an sawp. United hian Liverpool leh Arsenal te hnehin beiseina thar nei mah se Manchester City lakah goal ruk chhuahin an mualpho a, a bul aṭanga an intuai thar leh a ṭul.
United buaina chu khelmual chhungah chauh ni loin khelmual pawn lam pawh a ni tel a, Cristiano Ronaldo chuan thawm a rawn nei ve reng bawk. November thla laihawlah club legend Ronaldo chu Piers Morgan lakah a puak chhuak a, United-in tih theih dang an nei ta lo - Portuguese forward nena an contract neih chu an chhu chat.
Ronaldo inlan hnuhnun ber hian United-in Aston Villa 3-1 in an hneh lo a, Unai Emery hote hi League Cup-ah 4-2 in an hneh let a, Ronaldo a tel tawh lo. Ten Hag-a hote hian match riat an chak zawn tawh a, heng zinga match nga hi league match a nih avangin table-ah pawh United dinhmun a ṭhat pha hle.
Squad ṭha zawk
Dutch manager Ten Hag tana chanchin lawmawm chu England tana khel pha lo Aaron Wan-Bissaka chu World Cup zawhah mi thar a ni a, right back-ah innghahna tlak niin squad a chhah phah sawt.
Tlarhnungah United-in player chhawr tur an ngah a, Ten Hag-a'n a duh ang tawkin squad a siksawi thei. Tlarhma lamah striker an mamawh a, January transfer-ah Wout Weghorst-a'n lalut. Dutch forward Weghorst hi Palace lakah a chhawr theih ang.
Weghorst chuan, "Ka khelh dan leh Ten Hag-a duh dan hi a mil a ni," tiin a sawi a, Palace lakah Dutch forward hian minute rei lote tal chu a neih a rinawm hle.
A ṭha lo lam
Man City an hneh ṭumin Diogo Dalot chu inhliam vangin a khel thei lo a, Jadon Sancho pawh inkhel turin a la inpeih lo. Eagles lakah hian player pahnih bakah hian Anthony Martial leh Marcus Rashford te dinhmun a chiang lo.
World Cup zawh hnua match tina goal khung thei Rashford hi United tan player pawimawh a ni a, a awm lo tur hi a pawi thei ang. Hei chauh ni a ni lo, Fred leh Casemiro ten yellow card an hmuh chuan hrem vangin Arsenal an hmachhawn thei dawn lo. Ten Hag-a hote an fimkhur a ṭul dawn.
Palace lam hi
Crystal Palace-in match hnuhnung berah Chelsea 1-0 in an hneh lo a, World Cup zawh hnua match nga an khelhah vawi khat chauh an chak. Eagles hneh chhun chu table hnuai lama awm Bournemouth a ni.
Amaherawhchu Eagles hi dahhniam ngawt a rem lo - tlarhmaah Wilfried Zaha, Eberechi Eze leh Jordan Ayew te an nei a, United tlarhnung tan hnawksak ang.
Palace manager Vieira chuan, "Tun dinhmunah inrintawkna kan hloh tih zep rual a ni lo. Hun ṭha kan bawhpelh a, insiamṭhat kan mamawh a ni," tiin a sawi. French manager Vieira hian a club hlui Arsenal puih nan Man United laka point hlawhchhuah ngei a tum ang.