Tlai dar 1:30-ah India vs New Zealand

Vawiin tlai dar 1:30 hian India leh New Zealand ten ODI match thum an khelh tura vawi khatna chu Rajiv Gandhi International Cricket Stadium, Hyderabad-an an khel dawn.

Men in Blue hi mahni muala khel tur an nih bakah Sri Lanka hneh zo hlim an ni. India tan Virat Kohli a che ṭha a, Lions lakah ṭum hnih century siamin a hnuhnung zawkah phei chuan thi loin 166 runs a siam hial.

New Zealand laka mipui mit fukna tur erawh Suryakumar Yadav a ni thei ang. SKY hi Lions lakah T20 match-ah a che pui a, ODI-ah erawh Shreyas Iyer an thlang zawk.

Iyer hian Sri Lanka lakah hian run tam a siam lo a; 28, 28 leh 38 runs chauh a siam a, Black Caps laka tel loh chhan erawh inhliam vang a ni thung.

SKY hi T20 batter ranking-ah pakhatna hial ni mah se ODI-ah a che fuh hleithei lo a, India ODI squad-ah a dinhmun sawh nghet a duh a nih chuan a hun ṭha hi bawhpelh loh a ṭul ang.

India Squad: Rohit Sharma (Captain), Shubman Gill, Ishan Kishan (wk), Virat Kohli, Suryakumar Yadav, KS Bharat (wk), Hardik Pandya (vice-captain), Rajat Patidar, Washington Sundar, Shahbaz Ahmed, Shardul Thakur, Yuzvendra Chahal, Kuldeep Yadav, Mohd. Shami, Mohd. Siraj, Umran Malik.