Andy Murray tak tak kan hmu leh ta!

Hliamin hun rei tak chhunga tlak buak a, a hmangaih tennis a khel thei lo vang vang. A infiamna ngainat hi a duh aia hmain chawlhsan a ngai dawn ni pawhin a lang hman, mahse beidawng loa a beih hram hramna chuan rah ṭha a chhuah - Andy Murray tak tak kha a lo kir leh ta e!

Australian Open 2023 khelh laiah Murray chuan nimin khan a match hmasa ber a khel a, seeded 13-na ni phak Matteo Berrettini nen darkar li leh minute 49 zet an inkhelh hnuah Britain tlangval hi 6-3, 6-3, 4-6, 6-7 (7-9), 7-6 (10-6) in a chak.

Murray hian a match lehpekah chuan Fabio Fognini leh Thanasi Kokkinakis inkhela chak zawk a hmachhawn leh dawn. Nizan khan Novak Djokovic chuan a match hmasa ber a khel a, chanchinbu buatsaih laiin result kan hre hman lo.

Mipa singles inkhel dangah Alexander Zverev pawhin fiahna hautak a paltlang. German tlangval hian Juan Pablo Varillas nen set nga an khelh hnuah 4-6, 6-1, 5-7, 7-6(3), 6-4 in hnehna a chang hram, tun season bika a chakna hmasa ber a tawng.

Murray a inlar
Australian Open khelh ṭan hmain Murray chuan a dam ṭha tih a sawi a, tennis chawlhsan tumna a neih rih loh thu thlengin a sawi. A tan Australia ram nipui hnuaia inkhelh chu chona a ni a, beiseina nen Melbourne Park a lut.

Khua a lum em avangin stadium chung nei loa match ṭhenkhat chu chawlh lailawk a ngai hial. Rod Laver Arena erawh a chung khuhna a awm avangin a chhunga inkhel a nghawng lo, boruak lum erawh a nghawng ve tho tih a lang.

World number 1 hlui Murray hi set hnuhnung ber an khelh laiin 5-4 in an hniam zawk, a khingpui Berrettini-a'n match point a hmuh tawh chu a pawtthla a, tie break khelh zui puiin hnehna a chang let zawk ta daih.

Kum 2017 hnua a vawi khat nan Grand Slam bikah Murray hian ranking sang zual 20 zinga mi a hneh, a khel bawr hlam vanga a chawlh rei bakah ngai a awh theih loh avangin a dinhmun a hniam hman hle a, tunah chuan beiseina a nei thar leh mek.

Grand Slam vawi thum champion tawh Murray chuan, "Australian Open khel tur hian kei leh ka team chu kan inbuatsaih ngawrh hle. Matteo nen kan inkhel dawn tih ka hrat khan fimkhur a ngai tih ka hria, tun ṭuma ka khelh dan kha chu beisei phak bak a ni," a ti.

Zverev tan fiahna
Season hmasa French Open semifinal-ah Alexander Zverev leh Rafael Nadal an inkhel a, kerek hliam vangin Zverev a inkhel tlian ve thei lo. Clay court inelna lian aṭangin wheelchair hmanga nawr chhuah a ngai hial.

German tlangval hian season hmasa a hmang chhunzawm thei lo a, tun season a bul ṭannaah pawh a chak lo. A tawi zawnga sawi chuan Australian Open khelh hma khan inbuatsaihna a nei ṭha thei lo, kerek hliam na tak a tawrh hnuah ngai a la awh leh lo.

Nimin khan Margaret Court Arena-ah Varillas nen an inkhel tawk hle. Kum 25 mi Zverev hi set lina an khelh lai phei chuan chak lo thei dinhmunah a ding hman, mahse huaisen takin a tho chhuak a, a khingpui service chhuhsakin set a la hram.

Hnehna chang turin Zverev-a'n vawi 69 ngawt a vaw chhuak a, a fore-hand hlauhawm tak kha a la nei. Zverev chuan, "Hnehna ka chan avangin ka lawm takzet, a chhan chu tun hnai thla sarih chhung chu hnehna chan vanga lawmna ang hi sawi tur ka nei lo.

"Tournament kan khelh chhunzawm turah eng nge lo thleng dawn chu ka hre lo, mahse ka tan chuan inelna hlawhtling tak a ni der tawh," a ti. Second round-ah chuan Michael Mmoh leh Laurent Lokoli inkhela chak zawk a hmachhawn leh ang.