Wolves-in Pablo Sarabia an lalut

Wolverhampton Wanderers chuan Spain winger Pablo Sarabia lalut turin a club khelhna Paris St-Germain chu inremna an neihpui a, an inremna zat hi pound maktaduai 4.4 a ni.

Kum 30 mi Sarabia hian nizan khan medical a nei a, he thuziak i chhiar meuh chuan an inrem fel tawh hial ang. Wolves-ah hian kum hnih leh a chanve chhung atan contract a ziak dawn a, thlasik transfer-a an player lakluh pathumna a ni ang.

Sarabia hian kum 2019 khan Sevilla aṭangin PSG a zawm a, French club tan hian match 98 khela goal 22 khungin assist vawi 12 a nei hman. World Cup 2022-ah khan Spain squad-ah a awm a, vawi khat a inlan.

Spain tan hian match 26 khel hmanin, goal kua a khung a, Wolves boss Julen Lopetegui nen Spain national age group lamah an lo inhrawn tawh a, Sevilla-ah an inhrawn hman bawk.

Sarabia hian Lopetegui-a hnuaiah competitive match erawh a la khel lo - season hmasa kha Sporting Lisbon-ah loan-in a khel a, match 45-ah goal 21 khungin, assist vawi 10 a nei thei. Tun season-ah erawh PSG tan match 19 khel hmanin, goal khung a nei lo.

Wolves hian thlasik transfer-ah Gabon midfielder Mario Lemina chu Nice aṭanga lalutin, Brazil forward Matheus Cunha chu Atletico Madrid aṭangin loan-in an la bawk a, an squad a chhah ṭha ta hle.