Klopp-a'n Liverpool chhuahsan a tum lo

Tun season-a che chhe tak Liverpool manager Jurgen Klopp chuan Anfield chhuahsan tumna a neih loh thu a sawi a, "Chhuak tura hrilh ka nih loh chuan ka chhuak lo ang," a ti.

Premier League table-a pakuana ni mek Liverpool coach Klopp chuan, "Manager dinhmun a inthlak lo a nih chuan thil dang a inthlak ang. Tun dinhmunah chuan chhuak tura min hrilhtu an awm a nih loh chuan chhuah ka tum lo.

"Chuti a nih chuan thil dang thlak danglam a ṭul hun kan thleng dawn a ni mai thei. Mahse, chu chu nakin hun atan chauh a ni a, kan la hria ang chu - tunah chuan a ni dawn lo," a ti a, nipuiah squad siksawi ngei a tum niin a lang.

Liverpool player zingah midfielder pathum James Milner, Naby Keita leh Alex Oxlade-Chamberlain bakah forward Roberto Firmino te chuan nipuiah contract an hmang zo dawn a, Klopp-a ṭawngkam thlirin anni hi chhuak thei hnaivai an niin a lang.

Klopp chuan, "Tuna thutlukna siam tur a la ni lo a, ngaihtuahna seng turin hun ka la ngah tawk. Tunah chuan ṭha taka kan inkhelh phawt a ṭul," a ti a, player chhuak turah thutlukna a la siam loh thu a sawi.

Reds hian point 10-in Premier League top four an hlat mek a, January-ah Netherlands forward Cody Gakpo lalut mah se player dang lakluh belh tumna erawh an nei rih lo.

Klopp hi fans leh media tam takin a player ngaite ring rei lutuk leh, a player-te chunga rinawm leh lutukah an puh a, mahse, German coach chuan hei hi a pha thung.

October 2015 aṭanga Liverpool enkawltu coach chuan, "Hetianga an thusawi hi chu ka hre fo tawh a, mahse, a dik lo. Ka player-te tan ka rinawm ngei a, mi zawng zawng hi kan rinawm tur a ni. Mahse, club tana ṭha lo tur thleng thlenga rinawm ka ni lo.

"Kan buaina hi ngaihtuah tur a tam ve bawk - kan player neih ṭha takin a hun liam taah hna ṭha tak min thawhsak a, a hna a thawk zo tawhah ngaia kaltir mai duhna a awm thei. A thlakna tur kan nei a nih chuan thil awm tak pawh a ni a, mahse, kan nei si lo a nih chuan player chhuahtir ngawt hian awmzia a nei lo," a ti.

Klopp chuan a player-ten a thusawi an ngaithla tawk loa sawi awm chu chhangin, "Hetiang dinhmunah hian ka awm khat khawp a, mahse, a fuh tawk loh changa thil kal dan chu ka hre ve.

"Germany-ah chuan player leh manager an inpawh tawk tawh lo, tiin kan sawi mai ṭhin a, mahse, tunah chuan a ni lo. Tun dinhmunah hi chuan mawhphurhna kan la vek a, tumah indem bik kan awm lo. Chutiang a awm a nih chuan kan buai khawp ang," a ti a, team boruak a ṭhat thu a sawi.

Liverpool hian nizan dar 1:15 khan FA Cup third round replay-ah Wolverhampton Wanderers an hmachhawn a, he thu buatsaih a nih lai hian result kan hre hman lo.