Silly Point; KUM THAR leh KUM TAWP CHIBAI

Kum 2023 kan chuangkai fel chiah emaw kan tih laiin, Indian Domestic Cricket kum tawp lam hmawr kan lo bawk hnai leh dawn ta reng mai. BCCI hnuaia season nga lai kan han inlan ve tak hnuah hian, hmasawn lam aiin hnungtawlh zawngin kan kal nge? Kan elpui ṭhenawm state dangte hi hma an sawn chak ve hrim hrim? tih hi zawhna lian tak a ni awm e.

Bihchianna
Kum 2018 aṭanga, khatia BCCI huang chhunga Professional Cricket khel ve thei tura Zofate kawng hawnsak kan han nih tak aṭang khan, tuna kan player-te leh Mizo bik Support Staff-te hi chuan hma nasa takin an sawn tih hai rual a ni lo.

An practice, chevel, hawiher leh hmachhawp han thlir a, titi pui chang te ka nei fo, professionalism-ah nasa takin hma kan sawn tih a chiang.

Chutihrual chuan kumin 2022-23 season a, kan Mizoram palaite result erawh duhthu a sam meuh lo a ni!

Muhil thawharh a hun
State dinhmun hlimthla ber leh tehfung lian ber First Class Cricket - Syed Mustaq Ali Trophy (T20 ) leh Vijay Hazare trophy (50 overs) inelna lamah chuan, India ram team lian zawk te nena dahkhawm an nih avangin, mi a ni leng tan lo chuan beisei tur a tam lo tih a hriat sa.

Mahse a pawimawh ber Ranji Trophy lama, team tenau ho dah khawmna Plate group-a team paruk zingah, a chung pali group Semifinal pawh thleng pha lo khawpa kan awm erawh inenfiah a ṭul.

Kan ṭhenawm Meitei unaute leh Sikkim hnuaia kan awm tlat hi chu rilru a na deuh, Manipur hian professional player pawh hmang loin Meitei hlangin an khel a ni.

Kan result avangin kan hotute - Governance lam changtute an insawifiah ve deuh chu a ngai ngei ang. Player leh team-te enin hma kan sawn tih hai rual a ni si lo.

A Governance lam (Apex Council) hi chu honorary post an nih angin, a rorel tur an ni mai a, Professional Cricket leh Sports-in a ken tel a ban pahnih dang - Administration leh Management lam talin insawifiahna an neih hi chu thil awm a ni.

Chutihrualin Governance lam hian engkim hi an lo khaikhawm vek zawk a, Professional hoin an khawih tur Administration leh Management lam Department hi Mizoram Cricket hian a lo nei lo hrim hrim zawk? A la rawn lang chiang zel turah ngai ang.

National headline-a kan han lan ve chhunah lah kan khaipa leh fawng chelhtute, constitution dan kalha post pahnih an luah kawp thu a ni daih mai - hawi san a harsa hle. Mizoram Cricket- phengphekhua a tlai hma hian, inenfiah deuh chu a ngai lo maw? kan elpui dangten min lehpel ang a, a ram leh hnam anga nuihzat kan hlawh hma hi a hlauhawm rum rum a ni.

A sakhming Jehu
Nipui hnih vel liam ta khan, CAM hnuaia 1st division inelna vung takin a kal a. Keipawh ka hun hnuhnung lam niin, ka khelhna club Chhinga Veng Cricket Club (3C) tan practice session kan nei a. Ka tih tur angte ka tih zawh hnuin, khelmual kil khatah chuan ka khelhpui rawlthar leh Mizoram future hote, tha za zawk leh vanglai hmang ṭan turte chetla vel chu uluk leh hmuhnawm tideuh hian ka lo thlir a.

Chutah, an senior player ber - team Val upa kil khata lo ding chu, rawlthar pakhat - a batting session ti zo chiah chuan, a harsatnate leh hriat belh duh a neihte min rawn zawt tur chuan min rawn pan nal nal a. "U Ruat, engtin nge ka innings hi ka siam ang? " tih ṭawngkam kha a hmang ni tain ka hria.

Ni e, he rawlthar talent ngah tak hi, khang hunlai khan a standard pha zan loin, a duh angin a khel ṭha tawk lo tih team lam khan kan hre tlang. Heng hun lai hian, keimah aiin he rawlthar hi a ṭha daih a, club lamah pawh top order-a ka postion ka kian daih tawh a, ama 'standard' a la phochhuak lo mai mai zawk a ni.

Titi-na hun thawl nuam tak kan hmang a, mi ril leh a thiam ber ni lo mah ila, ka tawnhriat leh hmuh dan chi hrang hrang te ka sawipui ve nual nghe nghe. Chu rawlthar chuan hma sawn zelin, Mizoram team lamah pawh min rawn 'retire' tute an ni chho.

A hringtu pain a boral san ṭuma a lungngaihna mittuite chu, amah titumruhtu a hmang zelin, cricket tuipui em emtu a pa tana hlan let ve theih a neih chhun chu cricket a ni tih a theihnghilh lo.

Ranji Trophy-ah Durtlang rawlthar Lalhruaizela'n kum 2019 khan century a lo siam tawh a, kar hmasa khan team ṭha tak Bihar lakah Jehu Anderson chuan century ropui tak mai a rawn sual chhuak ve leh ta. Team chak zawhpui chiah loh mah se, a chhanhim thung.

Rawlthar dang Joseph-a, Sangzela, Hruaia, Naveen etc tih te pawh hi, tun aṭanga rei loteah hetiang ang headline hi an rawn la luah ve dawn chauh tih sawi lawk tur hian, zawlnei a inpuan kher ka ngai awm lo e. Jehu Anderson i khel ṭha e, a aia nasa zawk leh tum ruh zawkin, century tamtak siam chunga, Mizoram rawn ti hmingṭha zel turin duhsakna Silly Point hmang hian ka hlan a che.