Copa del Rey: Atletico & Simeone beiseina

Spanish football-a inelna ngaihhlut hlawh tak Copa del Rey round of 16 chu nizan khan khelh ṭan a ni a, zaninah club langsar zinga mi Atletico Madrid chu an inlan dawn.

Nizanah Real Sociedad vs Real Mallorca leh Alaves vs Sevilla inkhel a awm a, he thu buatsaih a nih lai hian result kan hre hman lo.

Zanin dar 1:30-ah Atletico Madrid chuan Levante an lenchilh dawn a, beisei anga season hmang ṭha lo Atletico Madrid tan Spanish Cup hi season duhawm lo thaibo nana beiseina awmna hmun a ni.

Spanish club ngaihven hlawh zingah Valencia chuan zanin dar 11:30 hian Sporting Gijon an lenchilh dawn a, Athletic Bilbao chuan zan dar 12:30-ah Espanyol an lenchilh dawn bawk.

Mangchhia 
Atletico hian tun season-ah beisei angin season bul an ṭan lo - Champions League-ah FC Porto, Club Brugge leh Bayer Leverkusen te nena awm hoin, awlsam taka round of 16 lut mai tura beisei an ni.

Mahse, Atletico hian match ruk an khelhah vawi khat chiah chak an nei a, vawi hnih an khingpui inhnehtawkpuiin, vawi thum an tlawm a, group B table mawngphah luah chungin European football an mangṭha fel der.

La Liga-ah thawnthu a danglam lo - league match 17 khelh tawhah vawi riat chiah an la chak a, vawi li an khingpui inhnehtawkpuiin, vawi nga an tlawm tawh a, champion sawi rik chi a ni tawh lo.

Pathianni zan pawh khan Atletico hian khualmualah Almeria chu 1-1 in league-ah an inhnehtawkpui hram a, Angel Correa chuan goal hmahruai khung mah se El Bilal Toure chuan Almeria tan si phurh a sut a, Atletico defender Sergio Reguilon chu hnawhchhuah a ni bawk.

Beiseina
Atletico hi La Liga table bikah top four china awm an ni a, mahse, parukna Real Betis aia match khata khel tamin, an point hmuh zat a inang - top four-a an dinhmun pawh a him lo tihna a ni.

Diego Simeone leh a naute tan champion ai chuan, engtinnge Champions League kan khelh ang, tih chu ngaihtuahna senna tur zawk a ni a, a tawi zawnga sawi chuan Atletico tan tun season-ah Copa del Rey chiah champion beisei ngamna a awm tawh.

Hei vang hian Atletico tan zaninah chak loh a thiang lo a, mahse, Inrinni zanah Real Valladolid nen league match an la khelh dawn avangin neih ṭhat ber thawhchhuahpui a chi ang em, tih chu zawhna awm thei a ni.

Chutihrual chuan an khingpui tur Levante hi second division club ni mah se zuam sual theih an ni, tih hriat a ṭha - Segunda division-ah pathumna ni mekin, hmahruaitu Eibar chu point thum chauhin an phak lo a, Copa del Rey last 16 lut turin La Liga club Getafe an hneh bawk.

Inlan tur
Atletico tan hremna tuar zo Stefan Savic chu a inlan leh thei tawh dawn a, hetihlai hian Almeria laka hliam vanga inlan lo Jose Gimenez kir nan a hma mah mah mai thei - chuti a nih chuan Savic hian Mario Hermoso chu tlarhnung laiah a kawp thei ang.

Argentine right back Nahuel Molina leh Mozambique left back Reinildo Mandava te chu fullback hna chelh leh tura beisei an ni a, midfield-a Marcos Llorente, Koke, Rodrigo De Paul leh Pablo Barrios te ho an inkawp theih chuan Levante tan an sang hret mai thei!

Tlarhmaah Antoine Griezmann mawhphurhna a sang leh dawn a, Chelsea lamah João Félix kaltir tawh mah se Ángel Correa leh Álvaro Morata an la awm cheu bawk avangin Levante laka lungphanna tur niin a lang lo.

Chutihrual chuan Levante hian thawhhona ṭha chu an hmachhuan ber a ni dawn a, zaninah Atletico hneh tumin an khel ngam ang - Copa del Rey round of 16 hi single leg-a khelh a ni.