Niemeier hnehin Swiatek a tlang

Hmeichhe tennis world number 1 Iga Swiatek chuan Asutralian Open a match hmasa berah Jule Niemeier chu straight set hmangin a hneh a, harsatna lian tham lutuk tawk loin second round a inhlangkai.

Melbourne Park-a inkhelah, seeded pakhatna Swiatek hian 6-4, 7-5 in hnehna a chang, set a lak pahnih hi awlsam taka lak ni lo mah se, a kalkawng tibuai tur khawp erawh chuan harsatna lian tham a tawk lo thung.

Kum 21 mi Swiatek hian a match lehpekah chuan Camila Osorio a hmachhawn leh ang. Inkhel dangah Osorio hian Panna Udvardy chu 6-4, 6-1 in a lo hneh ve thung a, ani hi chu nuamsa takin a chak.

Swiatek chuan, "Jule khan service a nei ṭha em em a, dawnsawn a harsa ṭhin khawp mai. A nihna takah chuan a khelh danah min hruai lut hman, mahse ka inngaihtuah harh hnuah ka khelh dan phungin ka khel ve leh thei hlauh," a ti.

Polish nula Swiatek hian a hnehna chan chu Ashleigh Barty tan a hlan tih a sawi bawk. Barty hian season hmasa khan Australian Open nomawi hi a chawi a, mahse a hnu lawkah world number 1 ni chungin tennis a chawlhsan.

Inkhel dangah Aus-tralian Open champion tawh pahnih an intawng. Vawi hnih champion tawh Victoria Azarenka chuan kum 10 liam taa hlawhtlinna a channa hmunah sulhnu ṭha a nei leh mek, 2020 champion Sofia Kenin chu 6-4, 7-6 (7-3) in a hneh.

Player langsar dang - 2019 finalist Petra Kvitova pawhin 7-6 (7-3), 6-2 in Alison van Uytvanck a hneh. US Open 2019 champion Bianca Andreescu pawhin seeded 25-na Marie Bouzkova chu 6-2, 6-4 in a hneh ve bawk.