James hoin Lakers an chak

LeBron James chu Los Angeles Lakers innghahna a la ni zel, kum 38 a tlin hnuah pawh player ṭha bik a la ni. Nimin zing NBA regular season inkhelah James hian point 48 a nei a, a team Lakers hi Houston Rockets lakah 140-132 in a chakpui.

Tun hnaiah Lakers hi an che ṭha tawk lo, mahse tunah chuan a zawna match thum chhung an tlawm zawn tawhna chu an thai chhia. James hian season kal laia point a neih hnem ber ṭum a tawn bakah assist vawi kua a nei a, rebound vawi riat la bawkin an chak nan a thawhhlawk hle.

Point 24 neitu Russell Westbrook a thawh hlawk bawk, player pawimawh Anthony Davis inlan thei lo mah se Lakers chak nan James leh Westbrook te an che ṭha tawk a, mangchhia aṭanga an harh chhuak chu an lawmna tizualtu a ni bawk ang.

NBA regular season kal laiah Lakers hi vawi 20 an chak tling ta chiah a, ṭum 24 an tlawm tawh thung. Western Conference table-ah 13-na an ni mek a, playoff khel phak tur chuan an hmabak a hautak dawn hle.

Western Conference-ah hian team 15 an inel a, regular season an hman zawh hnua a sang zual pariatin playoff an khel ang. Playoff aṭang hian conference champion zawn tur niin, chumi hnuah NBA Finals an khel leh ang.

Inkhel dangah Boston Celtics tan Jayson Tatum-a'n point 51 teh meuh a nei a, a team hi Charlotte Hornets lakah 130-118 in a chakpui. Tatum hian tun season kal laiah point 50 neih tlinna match nga a nei tawh, hei hi an club record thar a ni.

Tun hnaiah Boston hi a zawnin match sarih ngawt an chak zawn ta, season hmang ṭha ber an nih miau avangin Eastern Conference-ah an dinhmun an sawhnghet chhunzawm zel a, hmahruaitu an nih tluan pawh a rinawm.

Golden State Warriors pawhin Stephen Curry-a point 41 hmangin Washington Wizards 127-118 in an hneh. A zawna vawi 10 an chakna ni turin Memphis Grizzlies chuan Denver Nuggets lakah 136-106 in hnehna an chang ve bawk.