Champion lai Rafael Nadal a tla

Australian Open mipa champion lai Rafael Nadal chu second round-ah a tla. Spanish star hian nimin khan Mackenzie McDonald chu 6-4, 6-4, 7-5 in a hneh lo - Grand Slam champion hnem ber a nihna chu Novak Djokovic tan nih rual theihna kawng a inhawng.

Thawhlehni zan khan Djokovic chuan a match hmasa ber a khel ve thung. Melbourne Park-a vawi kua ngawt champion tawh hian Roberto Carballes Baena chu 6-3, 6-4, 6-0 a sawpin inelna bul a ṭan fuh hle.

US Open champion hlui Dominic Thiem pawh a chak lo. Austrian star hi hun rei tak hliam vanga a chawlh hnuah ngai a la awh leh thei lo, a match hmasa berah seeded pangana Andrey Rublev chu 6-3, 6-4, 6-2 in a hneh lo.

Mangṭha Rafa
Australia ramah nipui lai a ni a, khua lum hle mah se nimin khan ruah a tla. Australian Open khelhna hmunpui ber Rod Laver Arena chu a chung khuhna hman a ngai, ni dang aiin boruak a uap zual hle tih a chiang.

Boruak lum viau mah se tawnhriat nei ṭha zawk Nadal hi chak tura rinkai a ni. Mahse, seeded pawh chang phak lo McDonald-a'n Rafa hmachhawn dan tur a hre riau, hun khawhral duh loin a nawr hmanhmawh thiam hle.

Set hnihna an khelh laiin Nadal hian ball vuak let tuma a umna lamah a khel bawr a ti na a, set a khelh zawh hmain natna vanga enkawl lailawk (medical timeout) a lak a ngai hial, khel chhunzawm thei tho mah se beisei a phak tawh lo.

Kum 2016 hnu lamah Nadal hi Australian Open aṭanga a tlak hma ber ṭum a ni hial. Season hmasa kha chuan final-ah Daniil Medvedev nen an inkhel a, set hnih a hloh hnuah a tho chhuak, kuminah erawh thawnthu a danglam ta.

A na asin...
Grand Slam vawi 22 champion tawh Nadal chuan, "A chang hi chuan duhthusam anga khelh theih loh hi chu a hrehawm a, hliamin min tlak buak phei hi chuan thinrim mai te pawh a awl ṭhin, amaherawhchu infiamnain a ken tel a nih avangin pawm a ngai.

"Ka tan Australian Open chu tun season atan a tawp a, ka tawp hlenna tur a ni em, tih erawh ka la sawi thei lo. Theih ni se la chuan he hmun hi champion ni chunga mangṭha ka duh," a ti. A match hmasa zawkah pawh harsa takin hnehna a chang hram, tunah chuan a ṭang tlang zo ta lo.

American tlangval, world number 65 McDonald chuan, "Inkhel bul ka ṭan danah ka lawm, ka service leh ball vuak let a ṭha tih a lang ve bawk. Rafa te ang player ropui hneh hi chu chanchin lawmawm a ni," a ti.

McDonald hian Australian Open third round a luh vawi hnihna a ni, kum 2021 khan fourth round a lo lut tawh bawk. A match lehpekah chuan Yoshihito Nishioka leh Dalibor Svrcina inkhela chak zawk a hmachhawn leh ang.

Novak a lo kir
Season hmasa khan Melbourne khawpui aṭangin thawn haw a ni a, kuminah erawh nuam titakin a inkhel thei. Novak Djokovic chuan bul ṭan nan Roberto Carballes Baena chu 6-3, 6-4, 6-0 in in a sawp, mipui lawm a hlawh hle.

Kum 35 mi Djokovic-a'n khelmual a chhuahsan tur hi mipuiin ding chungin chibai an buk a, vawi kua ngawt a champion tawhna hmuna kir leh a nih avangin a mak hran lo. Kuminah a champion a nih chuan major title lak hnem lamah Nadal a nih rual ang.

Serbian star chuan, "Hetiang bak bul ṭanna ṭha chu a awm thei tawh chuang lo ang. Ka beisei aia ṭha leh ropuiin mipui lamin min lo lawm bawk, ka tan chuan engkim mai kha a fuh em em vek," a ti a, "Nole! Nole! Nole!" tia fans au thawm chu a ngaihlu hle.

Mipa singles inkhel dangah Casper Ruud chuan Tomas Machac lakah 6-3, 7-6 (8-6), 6-7 (7-5), 6-3 in hnehna a chang hram a, player langsar dang - Taylor Fritz, Holger Rune, Pablo Carreno Busta leh Grigor Dimitrov te an chak bawk.