Raducanu zinkawng a tawp

Emma Raducanu tan Australian Open chu second round-ah a tawp. British tleirawl hi nimin tlai khan hmabak nei eng tak Coco Gauff lakah 6-3, 7-6 (7-4) in a chak lo a, a hliam dam tawh mah se ngai a la awh leh rih lo tih a lang.

Player chhuak thar pahnih inkhel tur hian ngaihven a hlawh a, Rod Laver Arena-a entu pawh an ṭhahnem. Inkhel tir aṭanga a tawp thlengin American tleirawl Gauff a chungnung, set hnihnaah Raducanu rawn tho kang ve deuh mah se a ding chhuak phak tawh lo.

Kum 18 mi Guaff chuan, "Emma inkhel ka en fo tawh a, a khel chhe ngai lo. Chuvangin a tir aṭang khan kawng engkimah ka fimkhur a, inkhel hmuhnawm tak pawh kan chhawp chhuak niah ka ngai," tiin a sawi.

Gauff hi kum 16 mi a nih lai aṭanga mi hriat hlawh tawh a ni a, theihna nei sang bik leh hmabak nei eng tak a ni. Grand Slam nomawi a la chawi lo a, a match lehpek atan Qinwen Zheng leh Bernarda Pera inkhela chak zawk a hmachhawn leh ang.

Raducanu hian Aus-tralia ram a thlen hnuah a kerek a ti hliam. Australian Open inbuatsaihna tour-nament aṭang pawhin a inhnukdawk, mahse major tournament chu a khel thei ta tho. Amah-erawhchu, US Open champion hlui hi tun hma ang chu a la ni thei rih lo.

Nimin inkhel dangah seeded parukna Maria Sakkari chuan fiahna hautak a paltlang. Greek nula hian college zirlai Diana Shnaider chu 3-6, 7-5, 6-3 in a hneh - Zirtawpniah Zhu Lin nen an inhmachhawn leh dawn a ni.

Kum 18 mi Shnaider hi North Carolina State-a lehkha zir lai a ni, tennis stadium hmingthang Margaret Court Arena-ah Sakkari nen darkar hnih leh minute 33 an inkhel thei kha a hriatreng tawh tur thil a ni ang.