Zaninah Lionel Messi vs Cristiano Ronaldo

Paris Saint-Germain chuan zanin dar 10:30 hian Saudi All Star XI nen King Fahd Stadium, Riyadh-ah friendly match an khel dawn. Saudi All Star XI hi Al Nassr leh Al Hilal player inthlan pawlh an ni ang.

Saudi All Star XI-ah hian tun thlaa Al-Nassr zawmtu Cristiano Ronaldo-a'n captain armband a hreng dawn a, PSG tan Lionel Messi pawhin bul a ṭan ngei a rinawm. Player ropui pahnih hi December 2020-a Juventus leh Barcelona inkhelh hnua an inhmachhawn lehna hmasa ber tur a ni.

Kum 37 mi Ronaldo hian tun January transfer-ah Al-Nassr a zawm a, kum khatah pound maktaduai 173 hlawh tura sawi a ni hial. Amaherawhchu, Ronaldo hian FA-in an hremna a chhawm avangin Saudi club tan hian a la inlan lo.

Ronaldo tel loin Al-Nassr hian Al-Ta'ee 2-0 in hneh mah se an elpui Al-Shabab nen erawh goal awm loin an inhnehtawk. Portuguese forward hian hremna a hmang zo a, January 22, Inrinni zana Ettifaq an hmachhawn hunah a inlan thei tawh dawn. Chutihrualin Ronaldo hi Al-Nassr tana khelh hmain Saudi All Star XI tan a khel phawt dawn.

PSG lamah hian Messi bakah Neymar leh Kylian Mbappe te an awm dawn a, inkhel en man pawh a to dawn. VIP ticket special bik 'Beyond Imagination' chu £220,000 aṭangin an lilam ṭan a, pound maktaduai 2.2-a chhangtu Musharraf bin Ahmed Al-Ghamdi-a'n a chang.

Ticket changtu Ahmed Al-Ghamdi hi team pahnih dressing room-ah a kal thei ang a, player-te pawh thla a lakpui thei ang. French champion PSG pawhin friendly match khat lekah hian pound maktaduai 8.8 (€10m) an hlawh pha dawn.