Arteta hoten Invincibles aiin point hmu tam zawk

Premier League-ah Arsenal-in hma an hruai mek a, match 18 aṭangin point 47 an hmu tawh. Mikel Arteta hote hian match 18 khelh zawhah 2003-04 season-a Premier League nomawi chawitu Arsenal aiin point an hmu tam zawk.

Gunners-in league nomawi an chawi hnuhnun ber chu 2003-04 season kha a ni a, Arsene Wenger hoin London club hian hneh loh nei loin an champion.

Amaherawhchu, Wenger-a hote hian match 18 khelh zawhah point 42 an hmu a, tun ṭuma Arsenal point hmuh zat aiin point ngain an hmu tlem zawk.

Invincibles hminglem an pek hial Arsenal team hian match 18-ah hian an khingpui team panga Portsmouth, Manchester United, Charlton Athletic, Fulham leh Leicester City nen an inhnehtawk.

Arteta kaihhruai Arsenal erawhin Southampton leh Newcastle United te chiah an la 'draw' a, amaherawhchu hneh loh an tawng tawh thung. Gunners hneh loh hi an hmelma Manchester United an ni a, Old Trafford-ah 3-1 in an hneh lo.

January 22, Pathianni zanah Arsenal hian Man United hi an mikhual dawn a, nomawi chawi tura kawng dik an zawh theih nan hneh ngei an tum ang.