Haaland leh Kane an intawng dawn ta

Zanin dar 1:30 hian Eithad Stadium-ah Manchester City-in Tottenham Hotspur an mikhual dawn a, Premier League club ṭha pahnih hi tun season-a an vawi khat inhmachhawnna tur a ni. City leh Spurs hi an inhmachhawn leh thuai dawn a, February 5 hian Tottenham Hotspur Stadium-ah an inhkhel lehnghal ang.

Pep Guardiola hote tan league nomawi humhim turin chetsual a thiang tawh lo a, Arsenal an phak lohna chu point riat a ni mek. Gunners hian Spurs hi an hneh thei a, City pawhin kawng dik an zawh dawn a nih chuan an hneh ve a ṭul dawn a ni.

Striker ṭha pahnih
Tun season Premier League-a goal khung tam ber chu Erling Haaland a ni a, goal 21 a khung tawh. Man City striker hnaih bertu chu Harry Kane a ni a, goal 15 a khung. England captain hi City-in Haaland an dawr hmaa lak an tum kha a ni.

Premier League legend Alan Shearer chuan, "Pep Guardiola hian season liam ta khan Kane chu lalut se chanchin a danglam ang. City hian Haaland tan hmun ruak an nei tawh lo ang a, Kane hi City tan chuan khel se Haaland ang tho hian a khung tam ang," tiin nikum October thla khan a sawi.

Kum 29 mi Kane hian theihna sang tak a nei a, Pep leh City pawhin an hrechiang. Kum 2021 nipui bazarah khan City hian Kane manah hian euro maktaduai 150 (£127m) pawh sen an inhuam a, English striker pawhin Pep-a hnuaia khelh hi duh mah se London club-in hralh an phal lo.

Nikum nipui khan City-in Borussia Dortmund aṭangin pound maktaduai 51.2 sengin Haaland an lalut ta zawk a, Norwegian striker hi season khatna aṭangin a che ṭha nghal hle.

Kane vs Haaland
Premier League match bik thlir chuan Haaland hian goal 21 khung turin match 17 chiah a mamawh a, minute 67 dana goal khat khung zel ang a ni. Hetihlai hian Kane hian goal 15 khung turin match 19 a mamawh a, minute 113 dana goal khat khung zel ang a ni bawk.

Hriat tel atana ṭha erawh City leh Spurs te hi an inṭhat hleih a, hei vang tak hian Shearer pawhin Kane hi City-ah chuan khel se tun aiin goal a khung tam a rin phah reng a ni.

Amaherawhchu, Kane-a'n City a zawm ta lo a, nomawi vawi khatmah a la chawi loh avangin striker ṭha tak nichung siin nomawi chawi loin hun a hmang zo ve thei. Tuna a contract neih lai hi kum 2024-ah a tawp dawn a, English striker hian khawvel striker ṭha dang el phak zel a duh a nih chuan a hmalam hun tur uluk zawka ngaihtuah a ṭul ang.

World Cup zawh hnuah Kane hian goal li a khung leh tawh a, a khel ṭha chhunzawm zel. Haaland pawhin goal li khung tho mah se match thum chhung goal a khung tawh lo. Norwegian striker hian Chelsea leh Man United lakah minute 90 chhung a khel chungin goal a khung lo a, Spurs lakah insiamrem hret a mamawh ang.

City vs Spurs
Thawhlehnia Man City training-naah Kevin de Bruyne hmuh a ni lo a, Belgian midfielder awm loh chhan hi he thuziah lai hian hriat a ni lo. Chutihrualin Ruben Dias leh John Stones ten training an zawm tawh a, defender tawnhriat nei ṭha pahnih hi tlarhnung hnawhphui nan an pawimawh ang.

City hi tun hnaiah beisei an pha lo - Southampton hneh loh vangin League Cup aṭangin an tla. World Cup ṭan hma khan Brentford an hneh lo a, World Cup zawh hnuah Everton leh Man United lakah point an hloh leh tawh.

Spurs pawhin World Cup zawhah ngai an la awh bik lo. Brentord nen an inhnehtawk hnuah Aston Villa leh Arsenal te an hneh lo a, point sarih ngawt chu an hloh tawh. A êng zawnga thlir erawh chuan season liam ta khan Spurs hian City hi league-ah ṭum hnih an hneh a, hei hian inrintawkna a pe ang. Chutihrualin Antonio Conte hoten chak an duh a nih chuan Arsenal nena first half-a an khelh dan dah ṭhain second half-a an khelh dan anga bul an ṭan theih a ṭul dawn a ni.