Tu dinhmun nge ṭha ber?

Premier League champion thei dinhmuna ding an la ṭhahnem hle. Point dinhmun thlir chuan a sang pali chin hi chu champion thei vek an la ni chiang a, Newcastle United bik hi league nomawi la chawi ngai loh an nih avangin a sa seh tak tak hunah an duap a rinawm.

Hmahruai mektu Arsenal an la che ṭha tluang zel a, Tottenham Hotspur an hneh dan thlirin champion turin an ṭha tawk tih a lang. Mikel Arteta hote goal bawh a na a, goal venhim an thiam a, goalkeeper aṭanga forward thlengin hmuh an nuam hle.

Gunners hian FIFA World Cup hnuah West Ham, Brighton & Hove Albion leh Tottenham te an hneh tawh a, Newcastle lakah point hnih hloh mah se an khelh dan thlirin an vanduai tih a lang. Premier League-a London club dinhmun ṭhatna chu Europa League-ah group hmahruaitu niin last 16 an lut tawh a, League Cup-ah an tlak tawh avangin match khelh tur an nei tlem sawt bawk.

Champion lai Man-chester City pawh League Cup aṭangin an tla tawh a, an hahdam hret dawn. Chutihrualin February thla thleng thlir chuan Arsenal aiin match hnihin an khel tam zawk dawn. A êng zawnga thlir chuan Pep Guardiola-a'n an elpui ber Arsenal ṭum hnih a la hmachhawn dawn a, Gunners nena an inkar tihzim theihna hun ṭha an nei. January 27, Zirtawpni zanah Arsenal leh City te FA Cup-ah an inkhel dawn a, team pahnih inkara ṭha zawk a hriat thuai ang.

Manchester United tun hnaiah an che ṭha a, match hnuhnung berah Man City an hneh bawk avangin champion sawi ri thei zingah an tel. Amaherawhchu February thla thleng hian Man United hian Arsenal aiin match li ngawtin an khel tam dawn a, fiahna hautak an hmachhawn chhoh a ṭul ang. Nizan khan Crystal Palace an hmachhawn a, result kan hre hman lo.